Прэзентацыя фотаальбома «Карагод беларускіх абрадаў» Анатоля Клешчука адбудзецца ў Інстытуце культуры Беларусі (Мінск, вул.Каліноўскага, 12) 18 лютага, а 16-й гадзіне, ў фае 2-га паверха.
Кніга выйшла у выдавецтве «Беларусь» напрыканцы 2015 года і прызнана лепшым фотаальбомам у намінацыі «Фотапогляд» у рамках конкурсу «Мастацтва кнігі» на ХХІІІ Мінскай міжнароднай кніжнай выставе-кірмашы.
Анатоль Кляшчук — вядомы ў Беларусі і за яе межамі фотамастак, які правёў больш за 30 персанальных выстаў, найбольш значныя з якіх адбыліся ў штаб-кватэры ААН у Нью-Ёрку, двойчы ў будынку Еўрапарламента ў Бруселі, у Палацы Лігі Нацый у Жэневе, у Нацыянальным мастацкім музеі ў Мінску, у галерэі Вілі Бранд Хаус і ў Бундэстагу ў Берліне.
«Карагод беларускіх абрадаў» — вынік шматгадовай працы аўтара — фотакарэспандэнта газеты «Звязда». На старонках альбома змясцілася паўнавартаснае даследаванне традыцыйных свят.
Гэта каляндарныя абрады і звычаі з розных рэгіёнаў Беларусі, многія з якіх узятыя пад ахову дзяржавы, а таксама аматарскія формы засваення нематэрыяльнай культурнай спадчыны моладдзю і ўвядзенне гэтай абрадавай спадчыны ў гарадское асяроддзе, у інтэрактыўныя формы дзейнасці музеяў. Многія абрады яшчэ чакаюць сваіх даследчыкаў і пераймальнікаў.
Ён запрашае на прэзентацыю кнігі ўсіх зацікаўленых беларускай традыцыйнай культурай!
Аўтара можна запрашаць на любыя цікавыя абрады, якія ладзяцца ў Вашай мясцовасці. Тэл. Анатоля Клешчука (029) 627-18-77.
Каментары