Беларуска вырашыла год жыць без сэксу. «Можна знайсці тое, што прыносіць целу кайф, але не нішчыць душу»
Тры месяцы таму актрыса і арт-менеджарка Святлана Гайдалёнак распачала чэлендж — плануе год не займацца сэксам. Навошта? Пра эксперымент яна расказала ў падкасце «Паўгадзіны кардыё».
Святлана жыве цяпер у Варшаве. Неяк яна шукала групы медытацыі. Знайшла адну, а праз час там сказалі: каб далей прасвятляцца, трэба адмовіцца ад мяса. Другі пункт: трэба захоўваць чысціню. І трэці — адмовіцца ад стасункаў і не шукаць гэтых стасункаў, у сэксуальным плане захоўваць цэлібат.
«Я пачала нервова шукаць, дзе выйсце», — смяецца яна, згадваючы сваю рэакцыю на тых занятках. А пасля напісала арганізатарам медытацыі, што гэта для яе зарана.
Аднак думка засела ў галаве.
«Я акурат была ў стасунках з хлопцам, які да мяне тры гады ні з кім не займаўся сэксам. Я думала: калі нават для маладога хлопца гэта ок, то гэта магчыма».
Рашэнне прыйшло пасля таго, як у ліпені Святлана трапіла на нудысцкі жаночы пляж у Паланзе. Ёй спадабалася адчуванне сябе там, сярод іншых жанчын.
«Падумала, можна знайсці тое, што прыносіць целу кайф, але не нішчыць душу. Бо як бы мы ні круціліся, сэкс прыводзіць да стасункаў. А стасункі раняць», — разважае дзяўчына.
«Я пабачыла праблему ў тым, што вельмі хутка ўваходжу ў адносіны, адно за адным. Такое кіданне на першага сустрэчнага, няма часу, каб пазнаць асобу. Пачынаю разглядаць ў трамваі некага: о божа, сэксі бой, які ён клёвы, я б з ім замуціла. Яно кожны дзень здараецца і столькі сіл у мяне займае».
Дагэтуль максімальны перапынак у Святланы без сэксу быў паўгода.
«Можа, гэта жаданне зрабіць перапынак у стасунках. З 2018 года ў мяне было 7 сэксуальных адносін і 4 інтрыжкі без іх».
Дзяўчына кажа, што гэта дапамагае даследаваць і прыняць сваё цела.
«У мяне ёсць месцы на целе, дзе вельмі нетыпова для жанчын растуць валасы. І я вырашыла іх адпусціць. Гэта вельмі крыпі, але, паколькі гэта ніхто акрамя мяне не бачыць, я стараюся не састрыгаць іх і прымаць сябе такой, якая я ёсць. Бо наша культура цісне, каб жанчыны не мелі ні барады, ні вусоў, нічога».
Сябры на рашэнне Святланы рэагуюць па-рознаму.
«Ёсць такія рэакцыі: «Навошта, Светачка, зараз можа пачнецца ядзерная вайна, а ты без такой асалоды», — згадвае яна. Але былі і тыя, хто таксама захацеў паспрабаваць такі падыход.
Святлана раіць, што рабіць, калі раптам узнікае жаданне:
«Трэба выдыхнуць, пераключыцца, і звярнуць увагу на нейкі прадмет вакол сябе».
А што будзе, калі дзяўчына не стрымаецца?
«Пакаранне сабе не ставіла — бо я вытрымаю», — упэўненая яна.
Цяпер чытаюць
Памятаеце чыноўніка, якога крэатыўна адмазалі ад забойства чалавека на паляванні? Ён адмазаўся зноў2
Каментары