19 ліпеня ў Польшчы адбылася сур’ёзная тэхнічная аварыя ў сістэме кіравання паветраным рухам, з-за якой у некаторых аэрапортах краіны спыніліся вылеты самалётаў.
Першым пра праблему паведаміў Варшаўскі аэрапорт імя Фрэдэрыка Шапэна. Там удакладнілі, што з-за збою ў інфармацыйных сістэмах Польскага агенцтва паветранага руху (ПАПР) па ўсёй краіне немагчыма ажыццяўляць вылеты. Пры гэтым пасадкі працягваюцца, але згодна з адмысловымі працэдурамі.
Пазней прадстаўнік ПАПР Марцін Хадай пацвердзіў гэтую інфармацыю і дадаў, што зранку ў некалькіх польскіх аэрапортах уведзеныя абмежаванні на вылеты, хоць самалёты ўсё ж прызямляюцца.
Пасля 14-й гадзіны па польскім часе (15-й па беларускім) Польскае агенцтва паветранага руху паведаміла:
«Пасля прымянення неабходных працэдур асноўная сістэма кіравання паветраным рухам была адноўленая. Прычынай часовых праблем стала няспраўнасць, якая была неадкладна ліквідаваная. Падчас дзеяння рэзервовай сістэмы бяспека аперацый увесь час захоўвалася на максімальным узроўні».
Нядаўна падобны збой адбыўся ў аэрапорце Кішынёва, дзе прычынай стала нестабільнасць у электрасетцы, выкліканая расійскімі ракетнымі атакамі на тэрыторыі Украіны.
Цяпер чытаюць
Хто такі Міхаіл Мяховіч — сілавік, які вядзе канал ГУБАЗіКа і адказвае за прабіў людзей19
Каментары