«Выклікайце санітараў!» У Слуцку пенсіянеркі апантана ваююць з дзіцячай пляцоўкай
Случакі, што жывуць на вуліцы Леніна, заўважылі дзіўную сітуацыю ў іх мясцовасці. На дзіцячай пляцоўцы, якую толькі нядаўна зрабілі, з’явілася агароджвальная стужка. Хоць здавалася, што пляцоўка ўжо была гатовая для выкарыстання, піша BGMedia.
У мясцовых чатах жыхары пачалі спрачацца, у чым можа быць праблема. Cпачатку яны падумалі, што стужку маглі павесіць супрацоўнікі камунальных службаў праз тое, што пляцоўка магла быць не да канца зробленая. Але потым высветлілася, што камунальнікі тут ні пры чым.
Стужку павесіла жыхарка суседняга дома — пенсіянерка, якой не спадабалася, дзе менавіта ўзвялі пляцоўку. Гэтую інфармацыю пацвердзілі ў рэгіянальнай газеце «Слуцкі край».
Як расказваюць мясцовыя жыхары, апантанасць жанчыны дайшла да таго, што яна з самай раніцы сядзела на лаўцы і сачыла, каб ніхто з дзяцей не падышоў да турнікоў ці не пачаў гуляць на новай пляцоўцы. Дзеці таксама сутыкнуліся з агрэсіяй з боку іншых пенсіянерак, у выніку яны баяліся нават блізка падысці да гэтага месца.
Людзі тэлефанавалі ў ЖКГ, каб прыбраць гэтую стужку. Але ў выніку гэта зрабіла адна з жыхарак дома, бо на яе думку, «ім давялося б доўга чакаць». Але і гэта не адбылося без перашкодаў. Стужку доўгі час не давалі сарваць пенсіянеры, якія актыўна назіралі за пляцоўкай. Паводле слоў мясцовых, яны нават скаардынаваліся паміж сабой і завязалі на стужцы вузлы, каб яе было складана прыбраць.
Для многіх жыхароў сітуацыя выглядае не проста дзіўна, а абсурдна. У каментарах людзі прапануюць розныя спосабы «вырашыць праблему са злымі пенсіянеркамі»:
«Тут не міліцыю, а хуткую трэба выклікаць — разам з санітарамі»;
«Давайце ўвечары збярэмся ўсім чатам і самі з усім разбярэмся»;
«Выклікайце МНС на бабулек!».
Цяпер на дзіцячай пляцоўцы агароджы ўжо няма. Цікава, што камунальнікі далі афіцыйны адказ са спазненнем — яны паабяцалі зняць стужку, якой на той момант ужо даўно не было.
Каментары