Беларус пераканаў Данію, што яго некалькі судзімасцяў за наркотыкі — фактычна палітычны пераслед. І атрымаў прытулак
У 2020‑м яго збілі невядомыя, таму ён і з'ехаў у Данію.
Дацкая рада па справах бежанцаў (Flygtningenævnet) у жніўні 2024 года прызнала беларуса ўцекачом паводле Жэнеўскай канвенцыі. Мужчына прыехаў у Данію ў 2020 годзе. На радзіме яго некалькі разоў судзілі за захоўванне наркотыкаў — але рада палічыла гэтыя справы сфабрыкаванымі, метадам, якім улады распраўляюцца з крытыкамі рэжыму.
Заяўнік — праваслаўны беларус. Паводле яго аповеду, ён пачаў крытыкаваць уладу яшчэ ў 2006 годзе, бо не пагаджаўся з тым, як кіруюць краінай. Ён выказваўся супраць рэжыму на дэманстрацыях, у размовах з людзьмі і ў інтэрнэце — і трапіў у поле зроку ўладаў.
У перыяд з 2009 да 2014 года яго некалькі разоў асудзілі за захоўванне наркотыкаў. Сам заяўнік сцвярджаў, што абвінавачанні былі ілжывыя і звязаныя з ягонай палітычнай актыўнасцю. Рада з гэтым пагадзілася, абапіраючыся на фонавую інфармацыю пра становішча ў Беларусі.
Сітуацыя рэзка пагоршылася падчас выбараў 2020 года. Беларус расказаў, што незадоўга да ад'езду да яго прыйшлі трое невядомых, збілі яго і сказалі, што «парэжуць на кавалкі», калі ён не «заткнецца». Раней яго таксама выклікалі да ўладаў і папярэджвалі спыніць актыўнасць.
У Даніі мужчына сваю дзейнасць не спыніў: пратэставаў перад расійскім пасольствам, удзельнічаў у акцыях у падтрымку Украіны і працягваў крытыкаваць беларускі рэжым у сацсетках — пад уласным імем. Праз гэта, паводле яго слоў, ён атрымаў пагрозу ў сацыяльнай сетцы ад чалавека, які, ён упэўнены, звязаны з паліцыяй. Аднаго з яго родзічаў таксама выклікалі да ўладаў.
Рада палічыла заяўніка «вартым даверу» і адзначыла, што значная частка яго аповеду гучыць як перажытае асабіста. Разыходжанні ў дэталях вырашальнага значэння не мелі.
Асобна рада разглядала, ці не варта адмовіць у прытулку праз судзімасці — выключэнне, прадугледжанае Канвенцыяй для тых, хто здзейсніў цяжкія злачынствы. Падстаў для гэтага не знайшлі.
У выніку рада прызнала, што пры вяртанні ў Беларусь мужчына рызыкуе сутыкнуцца з пераследам, і выдала яму дазвол на жыхарства са статусам бежанца.
Цяпер чытаюць
Кобрынца, які застаўся без нагі пасля выбуху машыны, пасадзілі за кантакт з журналістамі. Пасля вызвалення ён расказаў сваю гісторыю1
Каментары
[Зрэдагавана]