Курс турэцкай ліры рэкордна абваліўся пасля затрымання мэра Стамбула
19.03.2025 / 11:17
Да 10:42 курс ліры апусціўся да 40,95 ліры за даляр, што стала мінімальным значэннем за ўсю гісторыю.
У далейшым валюта нязначна адыграла падзенне, і да 11:10 каштавала 38,91 ліры за даляр, вынікае са звестак Yahoo Finance.
Фондавы індэкс Borsa Istanbul 100 абваліўся на 6,9% у пачатку сесіі, праз што таргі акцыямі прыпынілі. Пасля іх аднаўлення зніжэнне індэкса склала 4,6%.
Раніцай стала вядома пра затрыманне апазіцыйнага мэра Стамбула Экрэма Імамаглу.
Паводле інфармацыі турэцкіх СМІ, у доме мэра ў раёне Сарыер прайшлі вобшукі. Акрамя таго, выдадзены ордары на затрыманне каля 100 чалавек, уключаючы журналістаў і бізнесменаў, звязаных са справай.