«Пашкоджана — гэта нічога не сказаць». У Магілёве ўраган нарабіў бяды на дзясятку могілак
У Магілёве пасля моцнага ўрагану, які прайшоў 9—10 ліпеня, моцна пацярпелі 11 гарадскіх могілак. Як заявіў міністр па надзвычайных сітуацыях Вадзім Сіняўскі, сказаць, што яны пашкоджаныя — гэта нічога не сказаць.
Тэрыторыі могілак завалены вялізнымі дрэвамі, ёсць разбураныя агароджы і пашкоджанні на саміх пахаваннях. Людзі не могуць нават падысці да магіл сваіх родных, таму пахаванні на гэтых участках часова немагчымыя.
«Пашкоджана — гэта нічога не сказаць. Яны проста заваленыя вялікімі дрэвамі. Ёсць пашкоджанні месцаў пахавання, агароджаў і гэтак далей», — пракаментаваў сітуацыю міністр надзвычайных сітуацый Вадзім Сіняўскі.
Для навядзення парадку на могілкі ўжо накіравалі 90 ратавальнікаў і 80 курсантаў Універсітэта грамадзянскай абароны, а таксама супрацоўнікаў МНС з Мінска і вобласці, якія маюць спецыяльны допуск да працы з бензапіламі. Яшчэ каля 105 чалавек, у тым ліку будучыя і дзейныя ратавальнікі, далучацца да працы.
Найбольш складаная задача — адсутнасць доступу для буйной тэхнікі: многія работы даводзіцца выконваць уручную. МНС, аднак, плануе завяршыць расчыстку цягам тыдня.
Сам горад, як паведамляецца, у парадак ужо прывялі — цяпер уся ўвага накіраваная на могілкі.
Чытайце таксама:
У Магілёве падчас непагадзі жанчыну забіла дрэвам, яшчэ чатыры чалавекі пацярпелі
Следчы камітэт апублікаваў падрабязнасці гібелі жанчыны ў Магілёве, на якую ўпала дрэва
У Магілёве ўраган знёс з балкона норкавае футра, якое знайшлося за тры кіламетры ад дома
У лясной гаспадарцы замяняюць нарады на разбіранне бураломаў
З-за ўрагану на Магілёўшчыне прыйдзецца высекчы 18 квадратных кіламетраў лесу