Турыстка назвала Гродна «невялікім правінцыйным гарадком». Беларусы не пагадзіліся
Турыстка з Казахстана пабывала ў Гродне і падзялілася ўражаннямі ў Threads, назваўшы абласны цэнтр «невялікім, правінцыйным гарадком». Пост выклікаў бурную рэакцыю, піша Hrodna.life.
«Пасля Мінска мы паехалі ў горад Гродна. Невялікі, правінцыйны гарадок. Вельмі прыгожы, утульны. Глядзелі, як запальваюць на вуліцах ліхтары. Слухалі музыкаў. Елі дранікі, пілі мясцовыя напоі. Гродна мне спадабаўся незвычайным каларытам», — напісала падарожніца і выклала некалькі фотаздымкаў са сваёй прагулкі па абласным цэнтры.
У публікацыі таксама аказаліся здымкі з Брэста — у тым ліку кадр з ліхтаршчыкам, што выклікала яшчэ больш абмеркаванняў.
«Напхалі — я спакойная»: рэакцыя карыстальнікаў
— Зайшла паглядзець, як аўтару «напхаюць» за «невялікі правінцыйны гарадок Гродна». І як жыхары Брэста абурацца з-за ліхтаршчыка, які раптам стаў запальваць ліхтары ў Гродне. Напхалі. Я спакойная, — напісала адна з карыстальніц.
— Пакажыце мне тую назіральную пляцоўку ў Гродне, з якой відаць, як ліхтаршчык у Брэсце запальвае ліхтары, — іранізаваў іншы каментатар.
«Гродна — не правінцыя!»
Найбольшае абурэнне ў беларусаў выклікала «правінцыйнасць» Гродна.
— Вы сур'ёзна? Невялікі правінцыйны гарадок??? Блін, у Гродне 360 тыс. насельніцтва. Абласны цэнтр, старэйшы за Піцер, а Вы правінцыйны? Дзякуй, — здзівілася адна з каментатарак.
Іншая карыстальніца пацікавілася, адкуль прыехала турыстка, што так «неасцярожна адгукнулася пра найпрыгажэйшы горад Беларусі».
Карыстальнікі расказвалі пра гісторыю Гродна, архітэктуру, пра тое, што горад быў каралеўскай рэзідэнцыяй, згадвалі, што ў ім зараз жывуць больш за 360 тысяч чалавек, параўноўвалі з еўрапейскімі гарадамі, якія маюць падобную гісторыю, і адзначалі, што іх ніхто не называе правінцыйнымі.
— Як мяне замілоўваюць гэтыя турысты, якія, прыязджаючы ў нашу краіну, называюць усе вялікія гарады «невялікімі і правінцыйнымі». У такім выпадку Цвер, Перм, Казань і іншыя — гэта таксама глухая правінцыя… А, і Смаленск яшчэ ўспомніла…, — абурылася беларуска.
Яшчэ адна карыстальніца адзначыла, што пост у цэлым атрымаўся добрым, але ўсё ўражанне перакрэслілася двума словамі — «правінцыйны гарадок».
Іншая карыстальніца ўказала аўтарцы, што тая пераблытала Гродна і Брэст, маючы на ўвазе фота з ліхтаршчыкам. І дадала, што Беларусь — невялікая краіна з адным горадам-мільённікам, і гэта Мінск. А Гродна — горад не маленькі.
Яшчэ адна дзяўчына адзначыла, што ёй няма чаго дадаць да іншых адказаў і сказала:
— Люблю Гродна ўсёй душой, адзін з самых прыгожых, атмасферных гарадоў, у якім прайшла палова майго жыцця.
«Гродна — гэта проста вялікая вёска»: меркаванне апанентаў
Але былі і тыя, хто пагадзіўся з правінцыйнасцю Гродна.
— Госпадзі, пачытаўшы каментарыі, успомніла, чаму ўсё жыццё хацела з РБ зваліць. Такой колькасці агрэсіўных калгаснікаў мала дзе ўбачыш. Жыла я неяк пару месяцаў у гэтым расхваленым Гродне, і гэта нават горш за правінцыйны горад. У цэнтры пару прыгожых старадаўніх будынкаў, пройдзеш 3 км і адразу акунаешся ў напаўразвалены савок. Нудна і нецікава, — напісала дзяўчына.
Некаторыя цяперашнія жыхары горада таксама прызналі, што Гродна складана назваць сучасным мегаполісам.
— Усім прывітанне, я жыву ў Гродне. Пацвярджаю — гэта невялікі правінцыйны гарадок. Давайце яшчэ накідайце пра сталіцу ВКЛ, абласны цэнтр і сотні тысяч жыхароў, — напісаў гродзенец.
— З цябе такі гродзенец, як з дупы самавар, сакалоў панаехаўшы, — парыраваў іншы карыстальнік.
На што хлопец сказаў, што гэта «рэакцыя тыповага ўшчэмленага правінцыяла» і адзначыў, што Гродна — «гэта проста вялікая вёска. Якая з калішняй сталіцы ВКЛ так і не змагла вырасці больш ні ў якую сталіцу».
— Не не змагла, а не далі, — адказаў іншы гродзенец.