У Мінску выкрылі групу лжэнарколагаў

У Мінску выкрылі групу людзей, якія пад выглядзе нарколагаў аказвалі медыцынскія паслугі без адукацыі і ліцэнзіі. Яны абяцалі «выводзіць з запою» і выкарыстоўвалі назву адной з расійскіх клінік — з дазволу яе кіраўніка, паведамляе Следчы камітэт.

Фота ілюстрацыйнае

Як высветлілі следчыя, схема дзейнічала з 2021 года і прынесла яе ўдзельнікам значны прыбытак — у агульнай суме больш за 250 тысяч рублёў.

Пачалося ўсё з таго, што 34‑гадовы беларус пасля лячэння ад нарказалежнасці ў Расіі атрымаў ад дырэктара той клінікі прапанову арганізаваць аналагічныя «паслугі» ў Мінску. Медыцынскай кваліфікацыі ён не меў, але ўзяўся за працу і хутка знайшоў сабе напарніка — 36‑гадовага жыхара сталіцы.

Прыкрываючыся назвай расійскай медустановы, яны размяшчалі ў інтэрнэце агрэсіўную рэкламу, у якой абяцалі ананімнасць, аператыўнасць і «гарантаваны вынік». Для надання выгляду легальнасці яны наймалі медработнікаў, але ўсе працэдуры праводзіліся фактычна дома, без абследавання, неабходных умоў і дазволаў. Заробленыя грошы дзялілі паміж тым, хто «лячыў», і арганізатарамі.

Праз некаторы час адзін з фігурантаў вырашыў працаваць самастойна, каб не дзяліцца прыбыткам. З вясны 2023‑га да лета 2024 года ён паспеў зарабіць больш за 120 тысяч рублёў, пасля чаго яго дзейнасць спынілі сілавікі.

Следства ўстанавіла ўсіх удзельнікаў незаконнай схемы. Абвінавачаныя прызналі віну і вярнулі атрыманыя нелегальна сродкі. Суд прыгаварыў аднаго з іх да пяці гадоў пазбаўлення волі ў калоніі ўзмоцненага рэжыму і штрафу ў 105 тысяч рублёў, а таксама забараніў займацца пэўнай дзейнасцю на пяць гадоў. Другі атрымаў тры гады пазбаўлення волі з такой жа забаронай.

Арганізатар схемы цяпер у вышуку.

Каментары да артыкула