Абнавілі карту пляжаў, дзе дазволена купацца
МНС Беларусі абнавіла карту афіцыйных пляжаў, дзе дазволена купанне і якія лічацца бяспечнымі для адпачынку каля вады.
Здымак ілюстрацыйны. Фота: «Наша Ніва»
Гэта спецыяльны сэрвіс, які існуе ўжо некалькі гадоў і штогод абнаўляецца, каб людзі маглі выбіраць абсталяваныя і правераныя месцы для купання. Карта даступная ў сэрвісе «Яндэкс» і дапамагае хутка знайсці дазволеныя зоны адпачынку.
Усяго па краіне такіх афіцыйных пляжаў каля 500, а ў Мінску — 23. Гэты статус азначае, што вада і дно там правераныя і ачышчаныя, зона абсталяваная буямі, кабінкамі для пераапранання, ценявымі навесамі, а таксама там абавязкова дзяжураць ратавальнікі.
Купальны сезон у Беларусі афіцыйна пачаўся 1 мая, але актыўны адпачынак ля вады звычайна пачынаецца з пацяпленнем у сярэдзіне месяца. Абноўленая карта павінна дапамагчы людзям выбіраць бяспечныя месцы для адпачынку летам.
Таксама МНС нагадвае пра правілы бяспекі: нельга купацца ў стане алкагольнага ап’янення, заплываць за буі, скакаць у ваду ў незнаёмых месцах або чапляцца за лодкі. Асаблівую ўвагу просяць надаваць дзецям і не пакідаць іх без нагляду каля вады.
Чытайце таксама:
Канец мая будзе прахалодным, вільготным і нестабільным
«Хрушчы лезуць у вокны і абляпляюць ліхтары». Навукоўцы патлумачылі іх нашэсце