U Minsku na Tydzień biełaruskaj movy projdzie biełaruskamoŭny kvest
Moładź BNF arhanizoŭvaje Tydzień biełaruskaj movy z 15 pa 21 lutaha. Kožny dzień achvotnyja zmohuć paŭdzielničać u dyskusijnych kłubach, pazmahacca za pieramohu ŭ biełaruskich nastolnych hulniach i paŭdzielničać u biełaruskamoŭnym kveście.
Kab paŭdzielničać u kveście, treba papiarednie zarehistravacca pa telefonach 017-284-50-12, 029-184-50-12, abo ŭ sacyjalnych sietkach.
Heta budzie haradskoje spabornictva. Udzielnikaŭ padzielać na kamandy, paśla vydaduć zadańni, źviazanyja ź biełaruskaj movaj i historyjaj.
Kvest raźličany na dźvie-try hadziny, u zaležnaści ad taho, u jakim tempie ŭdzielniki buduć vykonvać zadańni. Pieramožcam i ŭdzielnikam uručać pryzy.