Biełaruska — kandydatka na asobu hoda ŭ Polščy ŭ naminacyi «Kultura»
U Polščy zaviaršajecca hałasavańnie, jakim abirajuć asobu hoda. Siarod naminantaŭ na hetaje zvańnie ŭ naminacyi «Kultura» jość i biełaruska — Volha Paškovič, piša «Biełsat».
Volha Paškovič. Fota: polskanews.pl
Biełaruska naminavanaja za samuju vialikuju kalekcyju etničnych lalek (bolš jak 100 biełaruskich, polskich, ukrainskich i rasiejskich lalek) ułasnaha aŭtarstva, a taksama za praviadzieńnie majstar-kłasaŭ art-terapii i etnahrafii jak dla emihrantaŭ, hetak i dla palakaŭ.
«Jašče ŭ Biełarusi ja zachapiłasia lalkami-motankami. U pracesie napisańnia dysiertacyi ab turyźmie ŭ Biełarusi vyvučała biełaruskija tradycyi i ramiostvy. Ja sabrała vielizarnuju kolkaść materyjału na hetuju temu. Pryjechaŭšy ŭ Polšču try hady tamu, vyrašyła vizualizavać usie sabranyja raniej materyjały pra lalki. Tak źjaviłasia maja kalekcyja, jakaja naličvaje ŭžo amal 100 ekzemplaraŭ. Hetaja kalekcyja była vystaŭlenaja letaś. Za hod kalekcyja pavialičyłasia na čverć. Ja płanuju arhanizavać vystavu z bolš hłabalnym achopam. U majoj kalekcyi taksama pradstaŭlenyja sučasnyja lalki-motanki, stvoranyja na asnovie sučasnych matyvaŭ i patrebaŭ», — kaža Volha Paškovič.
Lalki-motanki Volhi Paškovič. Fota: polskanews.pl
Na svaich majstar-kłasach dla dziaciej i darosłych ludzi vyvučajuć taksama kulturu, tradycyi i abrady, źviazanyja z hetymi lalkami.
«Lalki — heta nie prosta hulnia, heta historyja nacyi, jejny tvar. Na prykładzie lalek ja pakazvaju, čym jany adroźnivajucca i što abjadnoŭvaje słavianskija narody. Ja liču heta vielmi važnym dla zachavańnia nacyjanalnaj kultury», — adznačaje naminantka.
Prahałasavać za biełarusku možna pa spasyłcy.