U Polščy pad Elbłanham źnik biełarus
Palicyja horada Elbłanh, što na poŭnačy Polščy, vydała abviestku pra pošuk hramadzianina Biełarusi Uładzisłava Masłoŭskaha, paviedamlaje «Biełsat».
Uładzisłaŭ Masłoŭski, jaki źnik u Polščy. Fota: Elblag.policja.gov.pl
Viadoma, što jašče 30 červienia jon vyjšaŭ z domu ŭ miastečku Talkmicka na vulicy Nadrečnaj, kirujučysia na pracu ŭ susiedni horad Branieva. Jon pavinien byŭ viarnucca a 16-j hadzinie, ale nie pryjšoŭ damoŭ i nie vychodziŭ na kantakt z rodnymi.
Źnikłaha apisvajuć tak:
- rost: 188 sm;
- ciełaskład: dužy, muskulisty;
- skura: śvietłaja;
- vałasy: karotkija, prostyja, śvietła-rusyja;
- u dzień źniknieńnia byŭ apranuty ŭ čorna-čyrvonuju kurtku, ciomnuju majku z karotkim rukavom, čyrvonyja spartovyja štany, čornyja spartovyja boty.
Palicyja apublikavała tolki adno fota ŭ nizkaj jakaści. «Biełsatu» nie ŭdałosia znajści hetaha čałavieka ŭ sacsietkach pošukam pa imieni i asobnym reviersiŭnym pošukam pa fota.
Palicyja prosić usich, chto vałodaje luboj infarmacyjaj, jakaja moža dapamahčy ŭ vyjaŭleńni miesca znachodžańnia źnikłaha, terminova źviazacca pa numarach ekstrannaj słužby 997 abo 112 ci z najbližejšym adździaleńniem palicyi. Taksama pra źnikłaha možna paviedamić na poštu policja@elblag.ol.policja.gov.pl.