U akupavanym Daniecku vadu ŭklučajuć pa viečarach raz na try dni

Pra krytyčnuju situacyju z vodazabieśpiačeńniem u akupavanym Rasijaj z 2014 hoda Daniecku napisaŭ u svaim telehram-kanale Aleh Caroŭ, jaki da 2014-ha byŭ adnym z najaktyŭniejšych prarasijskich palitykaŭ va Ukrainie, a paśla źbieh u Rasiju i ŭdzielničaje tam u dziejnaści kałabaracyjnych farmavańniaŭ. 

Fota: TASS

Jak śćviardžaje Aleh Caroŭ sa spasyłkaj na atrymanyja im paviedamleńni ź miescaŭ, žychary Daniecka znoŭ zastalisia biez vady — situacyja z vodazabieśpiačeńniem u centry Danbasa i navakolnych haradach stała krytyčnaj.

Sami kałabaracyjnyja ŭłady pryznajuć, što zapasy vady na akupavanaj Danieččynie źnizilisia da minimumu. Pavodle słoŭ kiraŭnika «ŭrada DNR» Andreja Čartkova, navat tych abjomaŭ, što jašče ŭdajecca zdabyć, niedastatkova ni dla ludziej, ni dla pramysłovaści, ni dla sielskaj haspadarki.

U vyniku ŭ najbližejšyja dni ŭ haradach Danieck i Makiejeŭka ŭvodzicca jašče bolš žorstki hrafik padačy vady — raz na try dni. U haradach Charcyzsk, Iłavajsk i Zuhres hety hrafik — raz na dva dni.

Prytym miascovyja žychary paviedamlajuć, što navat u hetyja dni vada źjaŭlajucca nie abaviazkova, da taho ž jana mutnaja — pić takuju ci vykarystoŭvać dla inšych bytavych patreb niebiaśpiečna. U vyniku ludziam davodzicca nasić vadu viodrami abo źbirać daždžavuju.

Prablema, jak śćviardžaje Aleh Caroŭ, nie novaja. Vadakanał «Sievierski Daniec — Donbas» ciapier nie pracuje, bo jahonaja častka ŭ Słaviansku kantralujecca ŭkrainskimi vojskami. Zamiest hetaha ŭ 2023 hodzie byŭ pabudavany novy vadavod «Don — Donbas» — hrandyjozny i darahi prajekt: amal 200 kiłamietraŭ trub ad raki Don u Rasii, vosiem nasosnych stancyj, pierachody praz darohi i reki. Spačatku budaŭnictva aceńvałasia ŭ 70 miljardaŭ rasijskich rubloŭ (kala 780 miljonaŭ dalaraŭ), ale paźniej cana jaho ŭźlacieła amal u try razy.

Niahledziačy na toje, što vadavod nibyta vyvieli na prajektnuju mahutnaść, faktyčna jon zabiaśpiečvaje tolki pałovu patrebaŭ rehijonu. Da bolšaści žycharoŭ vada ź jaho naohuł nie dachodzić, a pramysłovyja pradpryjemstvy ledź trymajucca. Zujeŭskaja CES za 40 kiłamietraŭ ad Daniecka — na miažy prypynieńnia pracy z-za adsutnaści vady dla achaładžeńnia, što moža pryvieści da adklučeńnia elektraenierhii i poŭnaha kamunalnaha kałapsu ŭ hetym rehijonie.

Usio heta nakładajecca na zaniadbanyja trubapravody i amal poŭnuju adsutnaść avaryjnych słužbaŭ.

Kamientary da artykuła