Viarchoŭny sud pakinuŭ u sile pryhavor byłomu dyrektaru Intex-Press Uładzimiru Janukieviču i źmianiŭ termin jaho namieśniku
Viarchoŭny sud Biełarusi 8 červienia razhledzieŭ apielacyjnyja skarhi źvinavačanych u «zdradzie dziaržavie» byłych kiraŭnikoŭ baranavickaj niezaležnaj haziety Intex-Press Uładzimira Janukieviča i Andreja Pakalenki, piša BAŽ.
Byłyja kiraŭniki baranavickaha navinavaha partała BAR24, a raniej — niezaležnaj haziety Intex-Press Andrej Pakalenka i Uładzimir Janukievič. Kałaž: BAŽ
U vyniku dvuchdzionnaha słuchańnia sudovaja kalehija Viarchoŭnaha suda pakinuła ŭ sile pryhavor Uładzimiru Janukieviču — 14 hadoŭ pazbaŭleńnia voli z adbyćciom u kałonii.
Andreju Pakalenku termin źniavoleńnia źmienšyli na adzin hod — da 11 hadoŭ.
Prysud Uładzimiru Janukieviču i Andreju Pakalenku byŭ ahučany ŭ Bresckim abłasnym sudzie 26 lutaha 2026 hoda. Abodvuch miedyjamieniedžaraŭ abvinavacili ŭ «zdradzie dziaržavie» pavodle artykuła 356 Kryminalnaha kodeksa RB.
Sudovy praces raspačaŭsia 3 lutaha 2026 hoda i prachodziŭ u zakrytym režymie. Spravu vioŭ sudździa Bresckaha abłasnoha suda Dźmitryj Kuroŭski.
Uładzimiru Janukieviču sud pryznačyŭ 14 hadoŭ pazbaŭleńnia voli i 3000 bazavych adzinak (135 tysiač rubloŭ) štrafu na karyść dziaržavy, Andreju Pakalenku — 12 hadoŭ pazbaŭleńnia voli i 1000 bazavych adzinak (45 tysiač rubloŭ) štrafu. Taksama jość infarmacyja pra vializnaje ahulnaje spahnańnie sumaj kala 200 tysiač rubloŭ.
Sutnaść abvinavačańnia dahetul nieviadomaja.
Bolš za paŭtara hoda z momantu zatrymańnia Janukieviča i Pakalenku ŭtrymlivajuć pad vartaj u SIZA.
Sprava Uładzimira Janukieviča i Andreja Pakalenki
Uładzimiru Janukieviču 65 hadoŭ. Jon byŭ dyrektaram i hałoŭnym redaktaram najbujniejšaj niezaležnaj rehijanalnaj haziety Intex-Press. 44‑hadovy Andrej Pakalenka pracavaŭ tam ža namieśnikam dyrektara pa raźvićci. Paśla taho, jak vydańnie było źlikvidavanaje, jany razam z kamandaj stvaryli navinavy sajt BAR24 (bar24.by).
U śniežni 2024 hoda supracoŭnikaŭ novaha haradskoha partała zatrymali. U ich žylli, a taksama ŭ redakcyi 3 śniežnia siłaviki praviali pieratrusy, zabrali techniku. Niekalkich čałaviek adpuścili, a suprać šaści zatrymanych, jakich źmiaścili ŭ SIZA, pa rasparadžeńni Bresckaj prakuratury zaviali kryminalnyja spravy ŭ miežach art. 361—4 KK RB («Sadziejničańnie ekstremisckaj dziejnaści»).
Sajt BAR24 apošni raz abnaŭlaŭsia 8 śniežnia 2024 hoda. 9 studzienia 2025 hoda jašče byŭ dastupny naviedvalnikam, ale z 13 studzienia 2025 hoda pierastaŭ adkryvacca i pakazvaŭ płašku «Vieb-sajt bar24.by vriemienno nie obsłuživajetsia».
11 listapada 2025 hoda imiony čatyroch asudžanych supracoŭnikaŭ BAR24, stvoranaha kamandaj kolišniaha Intex-Press Natalli Siemianovič, Mikity Piatroŭskaha, Rusłana Raviaki i Ludmiły Zielańkovaj byli dadadzienyja da «Pieraliku asob, datyčnych da «ekstremisckaj» dziejnaści, jaki składaje MUS Biełarusi. Usie čaćviora 19 žniŭnia 2025 hoda byli asudžanyja da «chatniaj chimii» — abmiežavańnia voli bieź źmiaščeńnia ŭ papraŭčuju ŭstanovu z abaviazkam vykonvać patrabavańni admysłovaha režymu.
Uładzimir Janukievič. Fota: Intex-press
Redakcyja niezaležnaj haziety Intex-press sutyknułasia z prablemami ŭ pracy paśla prezidenckich vybaraŭ 2020 hoda.
U traŭni 2021 hoda Ministerstva infarmacyi dasłała piśmovaje papiaredžańnie. U dakumiencie paviedamlałasia, što intervju sa Śviatłanaj Cichanoŭskaj, jakoje było apublikavanaje ŭ haziecie 14 krasavika, pryznanaje «ekstremisckaj infarmacyjnaj pradukcyjaj», i patrabavałasia vypravić «dapuščanyja parušeńni».
Taksama tady ž, 4 traŭnia, redakcyja atrymała list ad dyrektara Bresckaha filijała HRUP «Biełsajuzdruk» Taćciany Zinievič, u jakim havaryłasia, što z 5 traŭnia 2021 hoda pradpryjemstva skasoŭvaje damovu ab supracy i spyniaje realizacyju haziety. Admovilisia jaje pradavać i handlovyja sietki. RUP «Biełpošta» vyklučyła niezaležnaje baranavickaje vydańnie z padpisnoha katałohu.
Dyrektara TAA «Vydaviecki dom «Inteks-pres» Uładzimira Janukieviča dvojčy sudzili i štrafavali pavodle KoAP za publikacyju intervju Cichanoŭskaj.
15 lutaha 2023 hoda ŭ TAA «Vydaviecki dom «Inteks-pres» prychodzili supracoŭniki pravaachoŭnych orhanaŭ z pastanovaj ab praviadzieńni ahladu pamiaškańnia.
U chodzie ahladu zabrali sistemnyja błoki, fotaaparat, noŭtbuki, u tym liku asabistyja noŭtbuki supracoŭnikaŭ, a taksama kampjutarnuju techniku buchhałteryi i rekłamnaha adździeła. Na nastupny dzień zatrymlivali karespandentku vydańnia, jakuju da hetaha vyklikali na razmovu ŭ milicyju.
29 krasavika 2023 hoda ź inicyjatyvy prakuratury sud Baranavickaha rajona i h. Baranavičy pryznaŭ «ekstremisckimi materyjałami» sajt intex-press.by, a taksama staronki vydańnia Intex-Press u sacsietkach «Odnokłaśśniki», Instagram, Twitter, «VKontaktie», Facebook, TikTok, Telegram, i kanał na YouTube.
4 maja 2023 hoda biełaruskija ŭłady abmiežavali dostup da papularnaha baranavickaha internet-vydańnia. Zroblena heta było pavodle pastanovy prakurora Bresckaj vobłaści Viktara Klimava, a padstavaj dla pryniaćcia hetaha rašeńnia pasłužyli nibyta šmatlikija parušeńni hetym miedyja Zakona «Ab srodkach masavaj infarmacyi». Jak tady śćviardžała słužba infarmacyi prakuratury Bresckaj vobłaści, «na ŭkazanym partale nieadnarazova publikavałasia infarmacyja, jakaja jaŭna niehatyŭna charaktaryzavała hramadska-palityčnuju situacyju ŭ krainie paśla zaviaršeńnia vybarčaj kampanii i dyskredytavała dziejnaść dziaržaŭnych i pravaachoŭnych orhanaŭ».
Na pačatku červienia 2025 hoda na dziaržaŭnym telekanale ANT u dvuch častkach vyjšaŭ siužet Ihara Tura pra abłavu siłavikoŭ na redakcyi niezaležnych rehijanalnych ŚMI, siarod jakich było i BAR24. U vinu miedyjam stavili supracu ź niamieckaj ambasadaj, jakuju taksama abvinavacili — u finansavańni «ekstremisckich» resursaŭ (na momant publikacyi materyjałaŭ u miežach supracy z ambasadaj nivodnaje z nazvanych u videa miedyjaŭ nie było ŭniesienaje ŭ śpis «ekstremisckich»). U siužecie pakazali dopyt supracoŭnicy BAR24.