6 lutaha — tvorčy viečar Taćciany Mušynskaj

«Darohi, viečnyja darohi…» – radok Jakuba Kołasa daŭ nazvu tvorčaj viečarynie, što adbudziecca ŭ Dziaržaŭnym litaraturna-miemaryjalnym muziei Jakuba Kołasa 6 lutaha a 17-j hadzinie ŭ ramkach tradycyjnaha muziejnaha prajekta «Tvorčyja siemji ŭ domie Kołasa».

Va ŭtulnuju haścioŭniu Kołasavaha doma hetym razam zaprošana talenavitaja, tvorčaja siamja Mušynskich.

Michaś Mušynski – viadomy biełaruski vučony. Doktar fiłałahičnych navuk, prafiesar, člen-karespandent Akademii navuk, jon šmat hadoŭ zachoplena vyvučaje tvorčuju spadčynu Jakuba Kołasa. Adna z apošnich fundamientalnych knih daśledčyka – «Letapis žyćcia i tvorčaści Jakuba Kołasa».

Tamara Mušynskaja– piedahoh i mietadyst, kandydat piedahahičnych navuk. Aŭtarka šaści knih, u tym liku pracy «Biełaruskaja litaratura 20-40-ch hadoŭ XX stahodździa» (Minsk, 2000), šmatlikich artykułaŭ.

Taćciana Mušynskaja, dačka Michasia i Tamary Mušynskich, piśmieńnica, žurnalistka, teatralny krytyk. U litaraturna-miemaryjalnym muziei Jakuba Kołasa projdzie sustreča ź piśmieńnicaj. Viečaryna pavinna pradstavić jaje ŭ niečakanym śviatle. U adnym z załaŭ muzieja adbudziecca adkryćcio vystavy jaje fotarabot (sieryi «Mora, drevy, kamiani» i «Harady śvietu»).

Fatahrafavańniem Taćciana zachaplajecca daŭno, vyvučała hety pradmiet na fakultecie žurnalistyki. U peŭny momant nazapašanaje zachaciełasia pradstavić hledaču. Sieryja «Mora, drevy, kamiani» adlustroŭvaje admietnyja krajavidy z padarožžaŭ pa Krymie i Bałharyi. A sieryja «Harady śvietu» jadnaje raboty, zroblenyja ŭ Prazie, Vienie, Amsterdamie, Varnie, Paryžy. Kožny raz aŭtar imknułasia znajści niečakany i śviežy rakurs, kab pieradać peŭny emacyjny stan, svajo zachapleńnie harmonijaj pryrody i pryhažościu architekturnych šedeŭraŭ. 

U miežach sustrečy adbudziecca i prezientacyja novaha zbornika prozy piśmieńnicy. Kniha «Džuljeta i ekstrasens» vyjšła naprykancy 2013 hoda ŭ «Mastackaj litaratury» i źmiaščaje čatyry apovieści, apaviadańni i minijaciury. Hieroi hetych tvoraŭ – našy sučaśniki, siarod jakich pieravažajuć pradstaŭniki tvorčaj intelihiencyi. Z asablivaj cikavaściu daśleduje aŭtar śviet žanočaj dušy. U centry kožnaj apovieści i apaviadańnia – admietny žanočy vobraz, chvalujučaja, časam dramatyčnaja historyja kachańnia.

Padčas viečaryny vystupić uzorny chor «Vietryk» Dziciačaj muzyčna-mastackaj škoły mastactvaŭ № 1 h. Minska (dyryžor Viera Dabravolskaja). Svaje novyja tvory prezientujuć viadomyja biełaruskija kampazitary Alina Biezienson i Dźmitryj Daŭhaloŭ.

Adras muzieja: h. Minsk, vuł. Akademičnaja, 5

• 0
• 0
• 0
• 0
• 0
• 0
• 0
• 0