Śviatłana Aleksijevič pavinšavała Nadzieju Saŭčanka z dniom naradžeńnia
Ukrainskaja pałonnaja ŭ Rasii Nadzieja Saŭčanka siońnia adznačaje svoj dzień naradžeńnia. Joj spaŭniajecca 35 hadoŭ, jana naradziłasia ŭ Kijevie ŭ 1981 hodzie.
Saŭčanka słužyła lotčycaj va Uzbrojenych siłach Ukrainy, była zachoplenaja ŭ pałon u časie bajoŭ pad Łuhanskam i vyviezienaja ŭ Rasijskuju Fiederacyju.
Jaje źvinavacili ŭ hibieli rasijskich žurnalistaŭ i na pakazalnym pracesie asudzili da 22 hadoŭ turmy. Ad jaje chacieli publičnaha raskajańnia, a jana vykarystała sud dla asudžeńnia rasijskaj ahresii.
Paśla hetaha va Ukrainie jana stała nacyjanalnaj hierainiaj, ukrainskaj Žannaj d'Ark.
Z 35-m dniom naradžeńnia Saŭčanka pavinšavała Nobieleŭskaja łaŭreatka pa litaratury Śviatłana Aleksijevič.
«Darahaja Nadzieja! Zaŭždy pamiataj, što my z taboj, — havorycca ŭ vinšavańni, pieradadzienym u biełaruskuju hazietu NN.BY. — A jašče chaču skazać, što ŭ ciabie cudoŭnaja mama, ź jakoj my niadaŭna sustrelisia ŭ Kijevie. Vieru, što my chutka sustreniemsia, Nadzieja!» — skazała Śviatłana Aleksijevič.
Nobieleŭskaja łaŭreatka siońnia adlataje ŭ Ispaniju, dzie budzie prezientavać ispanskaje vydańnie svaich knih.
Nahadajem, prezident Ukrainy Piatro Parašenka zajaviŭ, što lotčyca Nadzieja Saŭčanka maje viarnucca va Ukrainu na praciahu niekalkich tydniaŭ.
Jon adznačyŭ, što damoŭlenaść ab terminach viartańnia Saŭčanka na radzimu była dasiahnutaja 18 krasavika. «Upieršyniu ŭ čas hetaj razmovy [z prezidentam Rasii Uładzimiram Pucinym] my atrymali śviatło ŭ kancy tunelu: była dasiahnutaja damoŭlenaść pra ałharytm vyrašeńnia hetaj prablemy, była dasiahnutaja damoŭlenaść ab papiarednim terminie», — zajaviŭ Parašenka.
Paviedamlałasia, što Saŭčanka majuć abmianiać na zachoplenych na terytoryi Ukrainy ŭ pałon vajskoŭcaŭ rasijskaha Hałoŭnaha raźviedvalnaha ŭpraŭleńnia Alaksandrava i Jerafiejeva.
Raniej Śviatłana Aleksijevič u liku dziejačoŭ hramadstva i kultury śvietu padpisała zvarot u abaronu Saŭčanka. Jany zaklikali jeŭrapiejskich palitykaŭ «pryniać nadzvyčajnyja miery z metaj nieadkładnaha i biezumoŭnaha vyzvaleńnia 34-hadovaj Nadziei Saŭčanka, hramadzianki Ukrainy, vykradzienaj i źmieščanaj u turmu na 20 miesiacaŭ u Rasijskaj Fiederacyi». Na dumku aŭtaraŭ lista, «naša zdolnaść vyratavać jaje žyćcio budzie pravierkaj efiektyŭnaści mižnarodnaj dypłamatyi i našaj addanaści jeŭrapiejskim kaštoŭnaściam».
-
«Hości chacieli sieści za stałom z kanapami, ale heta niebiaśpiečna». Minskaje kafe prakamientavała skandał ź dziaŭčynkaj ź invalidnaściu
-
Biełarusam možna nie płacić pa kredytach, jakija aformili machlary. Voś u jakich vypadkach
-
«Premija naležyć usim biełarusam, jakija praciahvajuć zmahacca». Cichanoŭskaja ŭznaharodžanaja niamieckaj premijaj, jakuju atrymlivaŭ Havieł
Ciapier čytajuć
Raptoŭna pamior Uładzimir Usier — niemałady aktyvist, jaki ŭlapaŭsia ŭ film BT i špijanaž u Polščy25
Kamientary