Nina Bahinskaja: Maja ziamla aryštavanaja, ale svaich jabłyń ja nie kinu
29 lipienia aktyvistka Nina Bahinskaja mieła vyzvalić aryštavanaje raniej lecišča ŭ Smalavickim rajonie ad asabistych rečaŭ. Ziamielny ŭčastak, razam z žyłoj i haspadarčaj zabudovaj, vystaŭleny na prodaž za 10000 rubloŭ.
List takoha źmiestu — «Ab vyzvaleńni pamiaškańnia» — Nina Bahinskaja atrymała z adździełu prymusovaha vykanańnia Smalavickaha rajonu.
Nina Bahinskaja paviedamiła Svabodzie, što nie źbirajecca hetaha rabić i ŭžo dasłała ŭ adździeł prymusovaha vykanańnia Pieršamajskaha rajonu Mienska apratestavańnie:
«Ja pavinna była vyzvalić ad rečaŭ pamiaškańnie — chacinu i chleŭ, jakija znachodziacca na leciščy sadovaha tavarystva «Hieolah» u Smalavickim rajonie. Ale pry dapamozie jurystaŭ ja apratestavała rašeńnie. Ja nie padparadkujusia hetym zakonam i hetaj uładzie, jakuju liču nielehitymnaj i antynarodnaj».
Za vuličnyja akcyi, u jakich Nina Bahinskaja ŭdzielničała ad pačatku hodu, joj prysudžany štraf ahułam 7000 rubloŭ novymi. Pryčym z pensii, jakaja składaje kala 250 rubloŭ, ułady štomiesiac zabirajuć 50 rubloŭ — u košt spahnańnia štrafaŭ.
«Ułady ŭžo vyvieźli ŭ košt pahašeńnia štrafaŭ pralnuju mašynu i mikrachvaloŭku, jakija znachodzilisia ŭ kvatery, dzie ja prapisanaja. Ale praz sud udałosia dakazać, što technika naležyć maim dzieciam, tamu jaje pavinny viarnuć. Ciapier uzialisia za ziamielnyja ŭčastki», — kaža Nina Bahinskaja.
Žančyna vałodaje dvuma leciščami. Pieršaje ŭžo apisanaje i vystaŭlenaje na prodaž za 10000 rubloŭ — u Smalavickim rajonie, druhoje pakul tolki aryštavanaje — u Puchavickim rajonie.
Niahledziačy na toje, što leciščy aryštavanyja, Nina Bahinskaja časta jeździć tudy, kab dahladać aharod i drevy:
«Ja nie padparadkoŭvajusia hetaj uładzie i nie pryznaju zakonnymi jaje dziejańni. Tamu praciahvaju dahladać učastki, vyroščvaju jabłyki. Navat kali ŭłady naviesiać tam svaje zamki, začyniać mnie dźviery, ja budu tudy pryjaždžać i źbirać svaje jahady, hrušy i jabłyki. Ja nie bajusia hetaj ułady i zaklikaju inšych nie bajacca. Treba nie płacić, nie padparadkavacca, nie vykonvać, nie pracavać na hetuju ŭładu. Razumieju, što mianie mohuć pasadzić u psychušku, jak toje zdaryłasia z Słavamiram Adamovičam i Kaciarynaj Sadoŭskaj. Ale mnie nia strašna. Heta ŭłady nas bajacca. U mianie vajaŭničy nastroj. Tak atrymlivajecca, što čym bolš cisnuć, tym bolš zapału supraćstajać».
Nina Bahinskaja naradziłasia ŭ 1946 hodzie. Jana zaŭsiodny ŭdzielnik vuličnych akcyj u Miensku, na jakija zaŭsiody prychodzić ź bieł-čyrvona-biełym ściaham.
Kamientary