Latučy ŭniviersitet nabiraje słuchačoŭ na adukacyjnyja kursy novaha siezonu

Litaralna 2 tydni zastałosia da dedłajnu padačy zajavak na ŭdzieł u kursach, sieminarach i škołach novaj prahramy Latučaha ŭniviersiteta. Raźbirajemsia z tym, što cikavaha prapanuje ŭniviersiteckaja supolnaść u siezonie 2016—2017 n.h.

Jak navučycca adroźnivać fiłasofskija idei, kulturnyja kancepcyi i kirunki, jakija farmujuć ciabie jak asobu, jak indyvidualnaść, ad sproščanych i vulharyzavanych idej, jakija robiać ź ciabie «pradukt maskultu», prahramujuć tvaje pavodziny, standartyzujuć viedy?.. Jak znajści tyja kaardynaty, sensavyja aryjenciry, jakija ŭ kantekście dynamičnaj i źmienlivaj sacyjalnaści dazvolać čałavieku navučycca nanoŭ «źbirać siabie»?..

Va ŭmovach aktualnych palityčnych, sacyjalnych i kulturnych vyklikaŭ pošuk adkazaŭ na hetyja pytańni stanovicca nadzvyčaj važnym. Adukacyja ŭ dziaržaŭnych univiersitetach, jakaja imkniecca da standartyzacyi i ŭnifikavanaści, nie zdolnaja chutka reahavać na tyja źmieny, što adbyvajucca ŭ hramadstvie. U adroźnieńnie ad jaje, niefarmalnaja adukacyja, bolš mabilnaja i raznastajnaja, dazvalaje znachodzić adekvatnyja sposaby i mietady pracy sa składanymi prablemami.

Latučy ŭniviersitet ad pačatku pazycyjanavaŭ siabie jak prastora i supolnaść, dzie kultyvujuć žyvoje myśleńnie, niaspynna refleksujuć ułasnaje raźvićcio i šukajuć novyja, adpaviednyja sučasnaści adukacyjnyja formy.

Tamu kožnaja prahrama Latučaha, z adnaho boku, praciahvaje dobryja tradycyi, ale, razam z tym, i sprabuje paznačyć novyja akcenty, zychodziačy z aktualnaj situacyi i patrebaŭ času, vyklikaŭ źniešnich i ŭnutranych.

Hety navučalny hod budzie akcentavany na pracy ź Indyvidualnaściu, Samavyznačeńniem i pabudovaj Identyčnaści - jak asabistaj, tak i supolnaj, z pošukami i vybudovaj Svajho Času.

Prapanujem pahladzieć na nazvy niekatorych ahulnaŭniviersiteckich kursaŭ i sieminaraŭ:

Indyvidualnaść i myśleńnie. Uvodziny ŭ fiłasofiju. (Uładzimir Mackievič),

Uvodziny ŭ postkałanijalnuju teoryju (Ihar Babkoŭ),

Sacyjalnaja teoryja i sučasnaść (Halina Rusieckaja)

Sučasnyja miedyja i pryncypy ich analiza (Alaksandr  Sarna),

Katehoryi i pryncypy histaryčnaha myśleńnia (Lilija Illušyna),

Teoryi i praktyki demakratyi (Viačasłaŭ Babrovič),

Majsternia Svamovy: Myślić pa-biełarusku (Michaił Bajaryn, Ihar Kulikoŭ)

Indyvidualnaść niemahčyma budavać biez padmurkaŭ — tych kulturnych tradycyjaŭ, jakija farmujuć našu identyčnaść jak biełaruskuju i jeŭrapiejskuju. U novym siezonie Latučy znoŭ zaprašaje ŭ Škołu Biblii Iryny Dubianieckaj i škołu Michała Aniempadystava D5. «Dezań!».

Dvuchuzroŭnievaja adukacyja ŭ Latučym ŭniviersitecie dazvalaje słuchačam udzielničać nie tolki ŭ ahulnaadukacyjnych kursach i sieminarach, ale i dałučycca da Škołaŭ mahistraŭ hulni - Škoła historyi idej, Mietadałahičnaja škoła, Škoła VKŁ, Škoła sacyjalna-fiłasofskaj analityki. Heta nievialikija hrupy, jakija pracujuć ŭ ščylnaj kamunikacyi ź biełaruskimi myślarami i intelektuałami. Adbor na škoły bolš surjezny i patrabuje abaviazkovaha sumoŭja z kiraŭnikami.

Bolš razhornutuju infarmacyju pra kursy, škoły i sieminary možna znajści u «Prahramie na hod» na sajcie Latučaha univiersiteta. Terminy padačy zajavak - da 10 kastryčnika 2016 h. (forma zajaŭki pa spasyłcy kursa/škoły).

I naprykancy — adkazy na najbolš častyja pytańni:

• Usie zaniatki ŭ Latučym biaspłatnyja
• Kursy pačnucca ŭžo naprykancy kastryčnika
• Zaniatki pieršaha i druhoha ŭzroŭnju buduć prachodzić pa viečaroch i pieravažna ŭ pracoŭnyja dni
• Pa dadatkovych pytańniach možacie źviartacca pa adrasie flyuniby@gmail.com

Kali Vy nie čakajecie «pravilnych adkazaŭ», a hatovyja da supolnaha pošuku, zasvajeńnia srodkaŭ, mietadaŭ i movy dla pracy ź Indyvidualnaściu, pošuku jaje miesca ŭ Myśleńni, u sučasnym śviecie, Vas čakajuć u Latučym univiersitecie!

• 0
• 0
• 0
• 0
• 0
• 0
• 0
• 0