Narviežskaja pryncesa raskazała pra stasunki z ezaterykam-afraamierykancam FOTA
U 2016 hodzie narviežskaja pryncesa Marta Łuiza stała pieršaj pradstaŭnicaj svajoj siamji, jakaja padała na razvod. U 14-hadovym šlubie ŭ jaje i piśmieńnika Ary Bena naradziłasia try dački. Z momantu rastańnia z mužam pra asabistaje žyćcio dački karala Charalda V ničoha nie było viadoma. Adnak 12 traŭnia, u Dzień maci, Marta Łuiza vyrašyła pryadkryć zasłonu tajamnicy i pakazała ŭ svaim akaŭncie ŭ instahramie novaha kachanaha — amierykanskaha ezateryka Šamana Dziureka.
«Kali vy sustrakajecie rodnasnuju dušu, vy razumiejecie heta. Mnie paščaściła sustreć maju. Šaman Dziurek źmianiŭ majo žyćcio, jak i žyćci mnohich inšych. Jon dapamoh mnie zrazumieć, što biezumoŭnaje kachańnie isnuje na hetaj płaniecie», — piša Marta Łuiza.
Na svajoj staroncy Dziurek nazyvaje siabie evalucyjnym navataram i nastaŭnikam pa raźvićci žanočych mahčymaściaŭ. Apiaredžvajučy pytańni pra raman z duchoŭnym lidaram, pryncesa praciahnuła: «Dla tych z vas, chto adčuvaje nieabchodnaść krytykavać: prytrymajecie koniej. Nie vam vyrašać za mianie ci sudzić mianie. Ja nie vybiraju svajho mužčynu, kab zadavolić kaho-niebudź z vas ci adpaviadać normam, jakija vy stvaryli ŭ svajoj hałavie».
Kachany pryncesy ŭ adkaz taksama źmiaściŭ post, dzie vielmi paetyčna pryznaŭsia joj u svaich pačućciach: «Toje, što ja atrymlivaju ad pryncesy Marty Łuizy, — heta čystaje pryniaćcie majho šmatmiernaha ja. Nie prosta šamana, ale i žančyny ŭva mnie, mocnaha mužčyny ŭva mnie, maleńkaha chłopčyka, inšapłaniecianina, jahuara, vučonaha, anioła i mnohich inšych. Usie jany kachanyja hetaj bahiniaj, jakuju ja šanuju i jakoj pakłaniajusia».
Kamientary