Dančyk pryznaŭsia, što jon hiej, i raskazaŭ pra pieršy seksualny vopyt z školnaj nastaŭnicaj
«Radyjo Svaboda» apublikavała padkast sa śpievakom i žurnalistam Bahdanam Andrusišynym, jaki bolš viadomy jak Dančyk. U im artyst zrabiŭ kaminh-aŭt i raskazaŭ pra suviaź sa svajoj školnaj nastaŭnicaj-francužankaj. Citydog.by zrabiŭ vytrymki.
Chto taki Dančyk
Dančyk (Bahdan Andrusišyn) naradziŭsia, vučyŭsia i pražyŭ bolšuju častku žyćcia ŭ Ńju-Jorku. Jaho maci Julija — trajuradnaja plamieńnica stvaralnikaŭ Biełaruskaj Narodnaj Respubliki Antona i Ivana Łuckievičaŭ.
Kali Dančyku było 16 hadoŭ, jon trapiŭ na kancert «Pieśniaroŭ», jakija hastralavali pa ZŠA. A ŭžo praz hod Bahdan, natchniony «Pieśniarami», zapisaŭ svoj pieršy albom. U 1989 hodzie Dančyk pryjechaŭ z hastrolami ŭ Biełaruś, dzie zavajavaŭ niejmaviernuju papularnaść. U druhi raz śpiavak pryjechaŭ na radzimu ŭ 1996 hodzie.
U 1997 hodzie Dančyk zajaviŭ pra zaviaršeńnie muzyčnaj karjery. Adnak jaho albomy da hetaha času karystajucca papularnaściu i ŭvajšli ŭ załaty fond sučasnaj biełaruskamoŭnaj muzyki.
Što skazaŭ Dančyk pra svaju seksualnaść
Pa słovach Dančyka, jaho pieršy seksualny vopyt zdaryŭsia ŭ 18 hadoŭ — partniorkaj była zamužniaja 28-hadovaja školnaja nastaŭnica.
«Pačynaŭ ja z hieteraseksualnych adnosin, ale sa ścisnutymi zubami (śmiajecca). Dva hady jana mianie hvałtavała: i maralna, i fizična. Jaje muž pra heta viedaŭ i kazaŭ joj, što jana zvarjacieje, tamu što ja nie chacieŭ być ź joj.
«U hetym vypadku davodzicca siabie vykručvać, kab heta zrabić. <…> Paśla hetaha ŭ mianie pačałasia doŭhaja čarada žančyn, jakija ŭ mianie ulublalisia, — jana była našmat daŭžejšaj, na žal, čym karotkaja čarada mužčyn. Voś taki los».
Na pytańnie žurnalistki, ci viedała nastaŭnica, što Bahdan — hiej, jon adkazaŭ: «Nie. Ja skazaŭ joj praz 30 hadoŭ. Ja jaje sustreŭ na vulicy, my pajšli na kavu. Jana radavałasia: «Aha, heta nie ja takaja niepryvabnaja! Prosta ty nie moh mianie chacieć».
Kamientary