Cyrymonija abviaščeńnia łaŭreata viadomaj biełaruskaj litaraturnaj premii adbyłasia 10 lutaha, u litoŭskim Domie piśmieńnika ŭ Vilni ŭ miežach Mižnarodnaha paetyčnaha fiestyvalu imia Michasia Stralcova «Vieršy na asfalcie». Paet, pierakładčyk, krytyk, movaznaŭca Juraś Paciupa byŭ adznačany za jaho tvorčuju i navukovuju dziejnaść, piša Reform.by.
Juraś Paciupa viadomy svaimi movaznaŭčymi ese, artykułami pra biełaruskuju litaraturu, jakija vychodzili ŭ časopisach Arche, «Frahmenty», «Krynica», «Dziejasłoŭ» i inšych vydańniach. Jon aŭtar manahrafii pra biełaruskija vieršy Jana Barščeŭskaha, šmatlikich słoŭnikaŭ; śfiera jaho intaresaŭ — vieršaznaŭstva, leksikahrafija, hramatyka, falkłarystyka. Letaś za svaje navukovyja pracy movaznaviec byŭ taksama adznačany na Mižnarodnym kanhresie biełaruskich daśledčykaŭ.
Niadaŭna vyjšła kniha Jurasia Paciupy «Roj», kudy ŭvajšli raniej drukavanyja zborniki «Noč» i «Sabaka», namierkavanyja — «Sad» i «Ruta», a hetaksama novyja tvory. Druhuju častku knihi skłali vybranyja litaraturaznaŭčyja artykuły i ese, napisanyja na praciahu tryccaci hadoŭ.
Nabyć knihu «Roj» možna tut.
Litaraturnaja premija imia Michasia Stralcova była zasnavanaja ŭ 2018 hodzie ŭdavoj piśmieńnika i paeta Michasia Stralcova Alenaj Dźmitryjeŭnaj Stralcovaj i Sajuzam biełaruskich piśmieńnikaŭ. Siarod jaje łaŭreataŭ — piśmieńnik i pierakładčyk Aleh Minkin, paetka Anchieła Eśpinosa Ruis, paetka Nasta Kudasava, dramaturh, publicyst i paet Anatol Viarcinski, paetka Antanina Chatenka.
Pamiłavany i departavany ŭkrainiec Katovič raskazaŭ, za jakuju abrazu na jaho pakryŭdziŭsia Łukašenka2
Kamientary