Padaryŭ dziciaci kvateru, ale potym šmat što pamianiałasia. Ci možna admianić daroŭnuju hramatu?
Biełaruska zrabiła daroŭnuju hramatu na karyść synu na ½ častku kvatery, ale jon raptoŭna skanaŭ. Ciapier na častku kvatery pretenduje jaho dačka. Ci možna ŭ hetaj situacyi anulavać damovu, piša «Minsk-Naviny».
«Niekalki hadoŭ tamu padaryła svaju kvateru ŭ roŭnych dolach dvum synam. Niadaŭna adzin ź ich raptoŭna pamior, i ciapier na žyłpłošču pretenduje jaho dačka, ź jakoj pry žyćci jon nie padtrymlivaŭ nijakich adnosin — tolki płaciŭ byłoj žoncy alimienty na jaje ŭtrymańnie, a ja naohuł nikoli nie bačyła ŭnučku. Ci možna anulavać dahavor?» — z takim pytańniem da vydańnia źviarnułasia Jelizavieta Piatroŭna.
Adkazała sudździa sudovaj kalehii pa hramadzianskich spravach Minskaha haradskoha suda Aleny Kruk.
— U adpaviednaści z punktam 3 artykuła 549 Hramadzianskaha kodeksa Respubliki Biełaruś u dahavory dareńnia moža być abumoŭlena prava admianić dareńnie ŭ vypadku, kali hety čałaviek pieražyvie adoranaha, — patłumačyła Kruk. — Takim čynam, čałaviek maje prava admianić svajo dareńnie ŭ vypadku śmierci adoranaha (u dadzienaj situacyi ŭ častcy adčužeńnia 1/2 doli kvatery) tolki pry najaŭnaści takoj umovy ŭ zaklučanym dahavory dareńnia.
Kali ździełka była zaśviedčana ŭ nataryjalnym paradku, dla admieny dareńnia nieabchodna źviarnucca da nataryusa. U inšym vypadku — niepasredna ŭ terytaryjalnuju arhanizacyju pa dziaržaŭnaj rehistracyi.
Pry hetym z metaj praduchileńnia vydačy dačce pamierłaha paśviedčańnia ab pravie na spadčynu i ŭźniknieńnia sprečki metazhodna vykanać admienu dareńnia da zakančeńnia šaścimiesiačnaha terminu, ustanoŭlenaha zakonam dla pryniaćcia spadčyny.
Kamientary