U ofis rasijskaha telehram-kanała Baza pryjšli siłaviki, hałoŭny redaktar zatrymany

«U ofis «Bazy» ź pieratrusami pryjšli palicejskija. Ranicaj palicyja i AMAP taksama naviedalisia ŭ kvateru hałoŭreda «Bazy». Paźniej, jak raskazali susiedzi, jaho vyvieźli ŭ nieviadomym napramku.

Prykładna ŭ toj ža čas Śledčy kamitet Rasii zajaviŭ, što zaviedzienaja kryminalnaja sprava ab pieravyšeńni słužbovych paŭnamoctvaŭ supracoŭnikami palicyi. A mienavita: u Krasnadarskim i Krasnajarskim krajach, a taksama ŭ Biełharadskaj vobłaści «vyjaŭleny fakty niezakonnaj pieradačy infarmacyi abmiežavanaha dostupu».

«U nastupstvie nazvanyja źviestki apublikoŭvalisia ŭ adnym z kanałaŭ miesiendžara Telehram», — paviedamiŭ SKR, nie ŭkazvajučy nazvu kanała.

Ci źviazana heta sprava ź pieratrusami ŭ redakcyi Baza i zatrymańniem hałoŭnaha redaktara, nieviadoma, prakamientavaŭ zajavu śledčych sam telehram-kanał.

Adnak ananimnaja krynica «Interfaksa» śćviardžaje, što havorka idzie pra pieradaču słužbovaj infarmacyi mienavita telehram-kanału Baza. TASS taksama źviazvaje spravu ŭ dačynieńni da supracoŭnikaŭ palicyi z kanałam Baza. Siłaviki zabirajuć telefony, kampjutary i dakumienty, dvoje žurnalistaŭ znachodziacca z pravaachoŭnikami, ich pracesualny status nieviadomy, havorycca jašče ŭ adnym paviedamleńni Baza. Adna z žurnalistak vydańnia była vyvieziena ŭ palicejski adździeł, u jaje zabrali ŭsiu techniku.

Paźniej stała viadoma, što hałoŭny redaktar Hleb Tryfanaŭ zatrymany pa spravie ab pieravyšeńni paŭnamoctvaŭ z boku palicejskich, jaho pracesualny status nie vyznačany, paviedamiŭ TASS jaho advakat.

Telehram-kanał Baza pryniata nazyvać blizkim da siłavikoŭ. Vydańnie łajalnaje da ŭładaŭ, ale pry hetym viadzie niezaležnuju redakcyjnuju palityku.

Anałahičnaja sprava była zaviedziena ŭ červieni ŭ Jekaciarynburhu. Tam blizkaje da ŭładaŭ vydańnie Ura.ru taksama sutyknułasia z abvinavačvańniem u niezakonnym nabyćci infarmacyi ŭ supracoŭnikaŭ pravaachoŭnych orhanaŭ.

U redakcyi pravodzilisia pieratrusy. 6 červienia Leninski sud Jekaciarynburha adpraviŭ pad aryšt redaktara Ura.ru Dzianisa Ałłajarava, jamu pradjaŭlena abvinavačańnie ŭ dačy chabaru słužbovaj asobie.

Jak pisaŭ «Interfaks», śledčyja dziejańni byli źviazanyja z zatrymańniem u sakaviku byłoha supracoŭnika palicyi, jaki pieradavaŭ ŚMI słužbovyja źviestki z štodzionnaj zvodki.

Pavodle źviestak Ura.ru, Ałłajaravu inkryminujuć pieradaču 20 tys. rubloŭ byłomu načalniku adździeła kryminalnaha vyšuku jekaciarynburhskaha adździeła palicyi № 10 Andreju Karpavu, jaki davodzicca jamu dziadźkam. Samoha palicejskaha adpraŭlać u SIZA nie stali — jaho źmiaścili pad chatni aryšt.

• 0
• 0
• 0
• 0
• 0
• 0
• 0
• 0