Pra fiksacyju kala Biarozaŭskaj DRES masavaj hibieli ryby paviedamili ŭ Ministerstvie pryrodnych resursaŭ. Pavodle jaho infarmacyi, zdareńnie adbyłosia ŭ technałahičnym kanale, jaki vykarystoŭvajecca dla skidu padahretaj vady z elektrastancyi i jaje nastupnaha astudžeńnia ŭ Biełym voziery.
Na miesca zdareńnia apieratyŭna vyjechali śpiecyjalisty Respublikanskaha centra analityčnaha kantrolu, «Biełhidramieta», a taksama pradstaŭniki miascovych inśpiekcyj pa achovie žyviolnaha i raślinnaha śvietu i navakolnaha asiarodździa.
Padčas papiaredniaha ahladu pravierka vyśvietliła, što zahinuła ryba adnaho vidu — karaś, i ŭsie asobiny byli prykładna adnaho pamieru. Pry hetym akurat karaś ličycca davoli tryvałym vidam, nie adčuvalnym da mnohich taksičnych rečyvaŭ.
Uličvajučy, što kanał źjaŭlajecca technałahičnym abjektam, tempieratura vady ŭ im moža pieryjadyčna być davoli vysokaj. Pa pieršych vynikach pravierak, uzrovień kisłarodu ŭ vadzie adpaviadaje normie.
Ciapier śpiecyjalisty praciahvajuć daśledavańni chimičnaha składu vady, kab dakładna vyznačyć pryčyny hibieli ryby.
Sami enierhietyki, jak paviedamlajecca, sumiesna z pradstaŭnikami pryrodaachoŭnych viedamstvaŭ viaduć pastajanny manitorynh situacyi. Śpiecyjalisty śćviardžajuć, što pieravyšeńniaŭ normaŭ pa vykidach na DRES nie było. U jakaści asnoŭnych ciapier razhladajucca pryčyny pryrodnaha charaktaru, uklučajučy vyłučeńnie taksinaŭ bahavińniem.
Kamientary