Ułady Słavakii vyrašyli zmahacca z avaryjnaściu na tratuarach — ciapier tam nielha budzie ruchacca chutčej za 6 kiłamietraŭ u hadzinu. Zakon vyklikaŭ burnaje abmierkavańnie i šmat žartaŭ u sietkach, i prymusiŭ palicyju davać tłumačeńni. Lahčej ad hetaha nie stała.
Jak paviedamlaje Politico, parłamient Słavakii pryniaŭ adpaviednuju papraŭku da zakona ab darožnym ruchu, jakaja zaćviardžaje maksimalna dapuščalnuju chutkaść na tratuarach u nasielenych punktach — 6 kiłamietraŭ za hadzinu.
Zhodna ź pieršapačatkovaj farmuloŭkaj, limit tyčyŭsia piešachodaŭ, viełasipiedystaŭ, skiejtbardystaŭ, a taksama karystalnikaŭ samakataŭ i elektrasamakataŭ. Pavodle tłumačeńniaŭ uładaŭ, miera zaklikanaja praduchilić sutyknieńni pamiž piešachodami i tymi, chto karystajecca lohkim transpartam.
Adnak inicyjatyva vyklikała škvał žartaŭ u internecie — ludzi cikavilisia, naprykład, ci aštrafujuć ich, kali jany pabiahuć za aŭtobusam.
U vyniku palicyja vymušanaja była ŭdakładnić: piešachodaŭ zakon nie datyčyć. Vice-prezident palicyi Raścisłaŭ Połakavič paviedamiŭ, što praviła raspaŭsiudžvajecca vyklučna na tych, chto karystajecca rolikami, samakatami, skiejtbordami, łyžami dy padobnymi srodkami, a taksama na dziaciej da 10 hadoŭ na rovarach razam z darosłymi.
Aŭtar papraŭki, Lubamir Važny ź levapapulisckaj partyi «Kirunak — Sacyjalnaja Demakratyja» (častka kirujučaj kaalicyi premjer-ministra Robierta Fica), padkreśliŭ, što hałoŭnaja meta — pavysić biaśpieku na tratuarach, zvažajučy na rost kolkaści sutyknieńniaŭ z udziełam samakatčykaŭ.
Palityk ličyć, što papraŭka budzie karysnaj dla dokazu parušeńniaŭ, bo dazvolić «abjektyŭna vyznačyć, ci ruchalisia jany chutčej, čym dapuščalna ŭ zonach, pryznačanych u pieršuju čarhu dla piešachodaŭ».
Niahledziačy na heta, apazicyja krytykuje papraŭku. Pavodle Marcina Piekara z partyi «Prahresiŭnaja Słavakija», niebiaśpieku dla piešachodaŭ stvarajuć nie samakaty, a aŭtamabili.
«Kali chočam mienš avaryj, treba budavać vieładarožki, a nie ŭvodzić absurdnyja abmiežavańni, jakija fizična niemahčyma vykanać. Na zhadanaj chutkaści viełasipiedyst ledź moža ŭtrymać raŭnavahu», — zajaviŭ jon.
Pakul što nie zrazumieła, jak ułady źbirajucca kantralavać vykanańnie hetaj normy paśla jaje ŭstupleńnia ŭ siłu 1 studzienia 2026 hoda.
Kamientary
Kak tam, kstati, nierušimyj błok litovskich sociał-diemokratov i "Zari nad Niemanom"?