Miljon jeŭra manietkami. Inśpiektara parkoŭki ŭ Hiermanii padazrajuć u kradziažy hihanckaj sumy z parkamataŭ
Palicyja zajaviła, što supracoŭnik municypalnych słužb «u mnostvie vypadkaŭ» kraŭ maniety z parkamataŭ i kłaŭ ich na bankaŭski rachunak, dostup da jakoha byŭ u jaho žonki.
U nievialikim bavarskim horadzie Kiempten aryštavany inśpiektar parkoŭki, jakoha padazrajuć u tym, što jon razam sa svajoj žonkaj skraŭ bolš za miljon jeŭra z parkamataŭ na vulicach, piša Bi-bi-si.
Palicyja zajaviła, što supracoŭnik municypalnych słužbaŭ u šmatlikich vypadkach kraŭ maniety z parkamataŭ i kłaŭ ich na bankaŭski rachunak, dostup da jakoha byŭ u jaho žonki.
Prakuratura zapadozryła kradziež, kali adno z kredytnych ahienctvaŭ adpraviła joj paviedamleńnie ab mahčymaj schiemie pa admyvańni hrošaj. Hiermanskaje infarmahienctva DPA paviedamlaje, što ŭ kastryčniku hetaha hoda prakurory atrymali źviestki, što na niekalki bankaŭskich rachunkaŭ stała pastupajuć najaŭnyja srodki.
24 listapada ŭ ofisach, źviazanych z padazravanymi, byŭ praviedzieny pieratrus, u toj ža dzień jany byli aryštavanyja. Inśpiektaru parkoŭki 40 hadoŭ, a jaho žoncy — 38, ich imiony nie nazyvajucca, pakolki ŭ Hiermanii zakony ab niedatykalnaści pryvatnaha žyćcia zabaraniajuć publikavać źviestki pra asobu ludziej, pakul jany nie pryznanyja vinavatymi.
Inśpiektaru parkoŭki i jaho žoncy mohuć być vystaŭlenyja abvinavačvańni ŭ 720 epizodach kradziažu.
Pakul niezrazumieła, na praciahu jakoha mienavita času padazravanyja mahli nazapasić nastolki vialikuju sumu šlacham kradziažu maniet z parkamataŭ.
Mer Kiemptena Tomas Kichle zajaviŭ, što «ŭzrušany i zasmučany» tym, što adbyłosia. Jon taksama zajaviŭ, što stvaraje kamisiju dla «pierahladu pracoŭnych pracesaŭ, vyznačeńnia mahčymych niedachopaŭ i raspracoŭki efiektyŭnych sposabaŭ ich likvidacyi ŭ budučyni».
«Pakul nie zavieršycca ŭvieś praces, pavinien dziejničać pryncyp prezumpcyi nievinavataści», — dadaŭ mer horada.
Kamientary