Jak brech sabaki dapamoh vyratavać žyćcio jaje haspadaru, u jakoha adbyŭsia sardečny prystup
Kali letaś brech sabaki razbudziŭ Channu Kuk siarod nočy, jana pabačyła, što muž, jaki lažaŭ pobač, dziŭna dychaje, a praź imhnieńnie pierastaŭ dychać zusim.
Kančatkova pračnuŭšysia, Channa pačała rabić mužu masaž serca i štučnaje dychańnie. Jana praciahvała masaž da samaha pryjezdu chutkaj dapamohi, čym vyratavała jamu žyćcio, piša Bi-bi-si.
Channa i jaje muž Adam žyvuć u nievialikaj vioscy Balinamałardzie, u hrafstvie Fiermana ŭ Paŭnočnaj Irłandyi. Jany ŭpeŭnienyja, što ich čatyrochhadovy sabaka dapamoh vyratavać žyćcio Adama, paśla taho jak u śnie ŭ jaho zdaryŭsia sardečny prystup.
25 listapada ŭ Łondanie załacistaha retryviera pa mianušcy Poli ŭznaharodzili tytułam «Hieroj reanimacyi».
Channa — supracoŭnica sacyjalnaj słužby. Jana ŭspaminaje, što noč była samaj zvyčajnaj, pakul kala hadziny nočy jaje nie razbudziŭ brech Poli.
Pa słovach 33‑hadovaj žančyny, spačatku jana vyrašyła, što Adam padaviŭsia, ale potym jon zusim pierastaŭ dychać.
«Raniej ja pracavała siadziełkaj i była pobač ź ludźmi ŭ apošnija chviliny ich žyćcia, tamu viedaju, jak hučyć ich dychańnie ŭ hetyja chviliny, — skazała jana. — Pačuŭšy jaho adnojčy, vy ni z čym jaho nie zbłytajecie».
«Jon taksama vielmi, vielmi zmahaŭsia za žyćcio. Ale ja dumała, što ŭsio, što jon užo nikoli nie vierniecca», — uspaminaje Channa.
Pa darozie z doma ŭ balnicu paramiedyki siem razoŭ sprabavali reanimavać Adama z dapamohaj defibrylatara.
Praz šeść dzion jon aprytomnieŭ u balnicy.
Adam zachaplaŭsia bieham, i na momant spynieńnia serca jamu było ŭsiaho 37 hadoŭ.
Daktary dyjahnastavali ŭ jaho dyłatacyjnuju kardyjamijapatyju i ŭstanavili impłantavany kardyjaviertar-defibrylatar (IKD). Heta pryłada adnaŭlaje sardečny rytm elektryčnym impulsam.
Paśla niekalkich tydniaŭ adnaŭleńnia ŭ balnicy, Adam i Poli znoŭ razam.
Emacyjanalnaje ŭźjadnańnie
«Poli — člen siamji, tamu ja zusim nie ździviŭsia, kali pačuŭ, što jana adyhrała takuju važnuju rolu, — raskazaŭ Adam. — Nie budu chavać: ja płakaŭ, u mianie na vačach byli ślozy, dumaju, u jaje taksama».
«Jana skuholiła, bo, napeŭna, dumała: «Vaŭ, ty znoŭ doma. Ja nie dumała, što ty vierniešsia, — uspaminaje Adam. — Heta byŭ emacyjny momant».
«Pry spynieńni serca, jak ja daviedałasia paźniej, usio adbyvajecca za ličanyja siekundy, i Poli dała mnie hetyja siekundy, — kaža Channa. — Poli vielmi dobra adčuvaje Adama. Jana pahaŭkała i zmoŭkła. Ja b skazała, što Poli viedała pra heta jašče da taho, jak heta adbyłosia. Dumaju, što, kali jana zahaŭkała, sardečny prystup tolki pačaŭsia».
«Ja lublu jaje da varjactva. Jana najlepšy sabaka na śviecie. Ni ja, ni jana nie zrabili ničoha asablivaha — ale my zrabili heta razam (vyratavali žyćcio Adama)», — dadaje Channa.
Adam vyłučyŭ svaju žonku i sabaku na premiju «Heart Hero», jakuju štohod pravodzić Brytanski fond British Heart Foundation.
Poli nie zmahła pajechać u Łondan na cyrymoniju, tamu miedal za akazańnie dapamohi ŭručyli joj na jaje lubimaj prahułačnaj ściežcy.
Fierhał Makkini z British Heart Foundation spadziajecca, što historyja siamji Kuk natchnić inšych ludziej navučycca rabić sardečna-lohačnuju reanimacyju.
«U Vialikabrytanii kožny hod adbyvajecca 40 tysiač vypadkaŭ spynieńnia serca pa-za balnicami. Vyžyvaje mienš za adnaho ź dziesiaci», — kaža jon.
«Z kožnaj chvilinaj, jakaja prachodzić paśla spynieńnia serca, šancy na vyžyvańnie źnižajucca na 10%. Heta krytyčna važny čas, tamu čym bolš ludziej buduć upeŭnienyja ŭ svaich siłach i zmohuć akazać dapamohu, tym bolš žyćciaŭ udasca vyratavać», — udakładniaje Makkini.
Adam kaža, što abaviazany žyćciom žoncy i sabaku.
«Jany hieroi. Bieź ich mianie b tut nie było», — skazaŭ jon.
Trenier i śpiecyjalist pa pavodzinach sabak Łuiza Hlejzbruk kaža, što ŭładalniki sabak mohuć niedaaceńvać, na što zdolnyja ich hadavancy.
«Sabaki pastajanna łoviać sihnały ad nas, jakija my, ludzi, albo nie razumiejem, albo nie zaŭvažajem», — kaža Łuiza.
«U sabak prykładna 220 miljonaŭ niuchalnych receptaraŭ, a ŭ nas kala piaci miljonaŭ, tamu my i stvarajem dla sabak prahramy, u ramkach jakich jany robiać nievierahodnyja rečy ŭ śfiery vyjaŭleńnia zachvorvańniaŭ, — raskazała jana. — Viadoma, toje, što Poli zdoleła vyratavać žyćcio i źmianić jaho chod nazaŭždy, — heta ŭzrušalna».
Jak na ahulnuju ŭvahu reahuje Poli?
«Jana lubić uvahu, zaŭsiody lubiła, z samaha pieršaha dnia», — kaža Adam.
«U jaje ŭjaŭleńni jana — samaja hałoŭnaja. Navat niahledziačy na toje, što ŭ nas jość syn i chutka źjavicca jašče adno dzicia», — dadaje jon.
Pa słovach Channy, u domie panuje Poli.
Ciapier čytajuć
U biełaruskija pašparty i dazvoły na žycharstva buduć upisvać hrupu kryvi9
Kamientary