U śpis zabaronienych prafiesij dla asudžanych za palityku dadali jašče adnu

Na Nacyjanalnym pravavym internet-partale apublikavana pastanova Saŭmina №696 ad 1 śniežnia, jakoj zaćvierdžana novaja redakcyja Pałažeńnia ab paradku praviadzieńnia atestacyi na prava atrymańnia kvalifikacyjnaha atestata aŭdytara. Dakumient ustupaje ŭ siłu paśla apublikavańnia, zaŭvažyŭ Reform.news.

Kali raniej pretendent dla prachodžańnia atestacyi pavinien byŭ pradastavić «źviestki, jakija paćviardžajuć adsutnaść niepahašanaj abo nieźniataj sudzimaści za ździajśnieńnie złačynstvaŭ suprać intaresaŭ słužby, ułasnaści i paradku ažyćciaŭleńnia ekanamičnaj dziejnaści, a taksama za ździajśnieńnie inšych złačynstvaŭ, źviazanych z vykarystańniem słužbovych paŭnamoctvaŭ», to ciapier u pałažeńni ŭkazany kankretny pieralik artykułaŭ KK.

Zhodna z novaj redakcyjaj, pretendent pavinien padać dakumient ab adsutnaści niepahašanaj abo nieźniataj sudzimaści za ździajśnieńnie ciažkich abo asabliva ciažkich złačynstvaŭ, a taksama za ździajśnieńnie złačynstvaŭ, jakija nie ŭjaŭlajuć vialikaj hramadskaj niebiaśpieki abo mienš ciažkich złačynstvaŭ, pieraličanych u śpisie. Akramia artykułaŭ, jakija praduhledžvajuć adkaznaść za machlarstva, kradziež, prysvajeńnie i rastratu majomaści, uchileńnie ad vypłaty padatkaŭ, skupku kradzienaha, naŭmysnaje bankructva, razhałašeńnie sakretaŭ i tajamnicy i h.d., u jaho taksama ŭklučany:

• Artykuł 341-1. Prapahanda abo publičnaje demanstravańnie, vyrab, raspaŭsiudžvańnie nacysckaj simvoliki abo atrybutyki.
• Artykuł 342. Arhanizacyja i padrychtoŭka dziejańniaŭ, što hruba parušajuć hramadski paradak, albo aktyŭny ŭdzieł u ich.
• Artykuł 342-2. Nieadnarazovaje parušeńnie paradku arhanizacyi abo praviadzieńnia masavych mierapryjemstvaŭ.
• Artykuł 361. Zakliki da mier abmiežavalnaha charaktaru (sankcyj), inšych dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś.
• Artykuł 361-1. Stvareńnie ekstremisckaha farmiravańnia albo ŭdzieł u im.
• Artykuł 361-2. Finansavańnie ekstremisckaj dziejnaści.
• Artykuł 361-3. Udzieł na terytoryi zamiežnaj dziaržavy va ŭzbrojenym farmiravańni abo ŭzbrojenym kanflikcie, vajennych dziejańniach, viarboŭka abo padrychtoŭka asob da takoha ŭdziełu.
• Artykuł 361-4. Sadziejničańnie ekstremisckaj dziejnaści.
• Artykuł 361-5. Prachodžańnie navučańnia abo inšaj padrychtoŭki dla ŭdziełu ŭ ekstremisckaj dziejnaści.
• Artykuł 369-1. Dyskredytacyja Respubliki Biełaruś.
• Artykuł 369-2. Niezakonnyja atrymańnie i (abo) vykarystańnie zamiežnaj biazvypłatnaj dapamohi.
• Artykuł 369-3. Publičnyja zakliki da arhanizacyi abo praviadzieńnia niezakonnych schodu, mitynhu, vuličnaha šeścia, demanstracyi abo pikietavańnia albo ŭciahvańnie asob va ŭdzieł u takich masavych mierapryjemstvach.

Taksama pretendent pavinien budzie padavać dakumient ab adsutnaści faktaŭ pryciahnieńnia da administracyjnaj adkaznaści pa šerahu artykułaŭ KaAP, kali nie skončyŭsia termin, paśla zakančeńnia jakoha pretendent ličycca takim, što nie padviarhaŭsia administracyjnamu spahnańniu. U hety pieralik uklučany:

• Artykuł 12.23. Nievykanańnie mier pa praduchileńni lehalizacyi dachodaŭ, atrymanych złačynnym šlacham, finansavańnia terarystyčnaj dziejnaści i finansavańnia raspaŭsiudžvańnia zbroi masavaha źniščeńnia.
• Artykuł 12.24. Niezakonnyja vykarystańnie abo vydavańnie źviestak, uniesienych u rejestr uładalnikaŭ kaštoŭnych papier, abo infarmacyi ab vynikach finansava-haspadarčaj dziejnaści emitenta kaštoŭnych papier.
• Artykuł 12.32. Parušeńnie paradku viadzieńnia buchhałtarskaha abo inšaha ŭliku (składańnia spravazdačnaści) i pravił zachoŭvańnia buchhałtarskich dakumientaŭ i (abo) inšych dakumientaŭ, nieabchodnych dla vyličeńnia i vypłaty padatkaŭ.
• Artykuł 13.3. Niezakonnaja pradprymalnickaja dziejnaść.
• Artykuł 23.6. Vydavańnie kamiercyjnaj abo inšaj achoŭnaj zakonam tajamnicy.

• 0
• 0
• 0
• 4
• 0
• 0
• 6
• 0