«Tam piekła dla ŭsich: i dla supracoŭnikaŭ, i dla asudžanych». Hutarka z byłym palitviaźniem, błohieram Paŭłam Śpirynym

U intervju «Biełsatu» jon raspavioŭ, što płanuje zaviaršyć revalucyju 2020 hoda i maje kankretny płan, a taksama padzialiŭsia, što bačyŭ i čałaviečnaść niekatorych siłavikoŭ, i ździeki sa zvyčajnych źniavolenych.

Pavieł Śpiryn — videabłohier, juryst, davieranaja asoba Śviatłany Cichanoŭskaj padčas prezidenckaj kampanii 2020 hoda. Jaho zatrymali 9 vieraśnia 2020 hoda i abvinavacili pavodle č.1 art. 130 KK («Raspalvańnie sacyjalnaj varožaści»). Nahodaj stali filmy Śpiryna «Hrań» i «Žudasnaja tajamnica hienprakurora Biełarusi: kart-błanš na sadyzm», jakija apublikavanyja na jaho YouTube-kanale. Za heta jon byŭ pakarany 4,5 hadami kałonii.

U kancy 2024 hoda, kali jaho termin padychodziŭ da kanca, na jaho zaviali novuju kryminalnuju spravu — pavodle art. 411 KK («Złosnaje niepadparadkavańnie administracyi kałonii»). Jon całkam adbyŭ pakarańnie i vyjšaŭ na volu 28 śniežnia 2025 hoda.

«Tam piekła dla ŭsich: i dla supracoŭnikaŭ, i dla asudžanych»

— Jak vy ciapier maralna i fizična?

— Ja siabie adčuvaju vydatna. Nijakich prablem u mianie asablivych niama. Vyzvaliŭsia ja jašče letaś, na miesiac prykładna vyjechaŭ u hłuchuju viosku. U mianie jość svoj dom u Mienskaj vobłaści. Adpačyŭ dobra — charčavańnie ŭ sielskaj miascovaści, pryroda, spakoj. Pryjšoŭ u siabie, skažam tak. Pahutaryŭ pa začynienych kanałach ź ludźmi. Potym pierajechaŭ u Miensk. U Miensku jašče trochi pabyŭ. I dalej vysunuŭsia dla praciahu «supraćpraŭnaj dziejnaści».

— Pakul vy byli ŭ źniavoleńni, ci było niešta, što vy chacieli zrabić na voli — kudyści pajści, ubačyć kahości? Kali tak, to ci ŭdałosia ŭžo heta realizavać?

Nie było takich žadańniaŭ. Ja chacieŭ zrabić revalucyju. U kałonii heta było niemahčyma. Tamu ja ŭvieś čas rychtavaŭsia, pisaŭ, čytaŭ, vučyŭsia, stasavaŭsia ź ludźmi. Ja žyŭ tym ža žyćciom, što žyvuć i astatnija asudžanyja. Pracavaŭ u stałovaj kałonii, byŭ u tych ža ŭmovach, što i inšyja ludzi.

— Byłyja palitviaźni raspaviadali strašnyja rečy pra turmy i kałonii. Praz što vam daviałosia prajści?

— Mianie vyratavała maja papiaredniaja dziejnaść. Maje filmy, rasśledavańni hladzieli i supracoŭniki ŭ kałonijach u tym liku. Pakolki heta było [kantent. — Red.] adekvatnym, jurydyčna ŭzvažanym, pravilnym, to pohlady, jakija ja prapahandavaŭ, padzialali i supracoŭniki MUS.

Treba adroźnivać supracoŭnikaŭ MUS. Jość kankretnyja fašysty — heta ŭsio biez vyklučeńnia hienierały MUS, prakuratury, Śledčaha kamitetu. Ź imi razmova budzie tolki na padstavie zakona. I zakon surovy.

Jość supracoŭniki, jakija na našym baku, jakija, ryzykujučy pahonami, ratavali i takich ludziej, jak ja. I nie palityčnych, i palityčnych. Tamu, viadoma ž, heta naša padtrymka. Jany čytajuć i hladziać tak zvanyja ekstremisckija kanały, i vas [«Biełsat». — Red.] hladziać i ličać. Jak i ŭsie, čakajuć, kali adkryjecca akno mahčymaściaŭ.

U hetym płanie mnie było lahčej. Hienierały zahadvali ździekavacca ź mianie. Ja prachodziŭ štrafnyja izalatary, PKT. Usio ŭ mianie było. Ja bačyŭ i žyćcio ŭ łahiery biez štrafnych izalataraŭ. Jano nie mienš ciažkaje, čym u štrafnych izalatarach. Tam piekła dla ŭsich: i dla supracoŭnikaŭ, i dla asudžanych. Viadoma ž, ja pakutavaŭ i narmalna pakutavaŭ, ale nie bolš, čym inšyja asudžanyja.

Pavialičyć

— Vy kažacie pra ŭsich ci pra palityčnych źniavolenych?

— Ja nie vyłučaju palityčnych i niepalityčnych — usie pakutavali. Nad mnohimi nie palityčnymi ździekavalisia tak, što ni adzin palityčny jašče tak nie pakutavaŭ. Heta ŭsio praca tak zvanych hienierałaŭ i ministraŭ, jakija niezakonna prysvoili sabie zvańni i pasady.Hladzicie, ja vyzvaliŭsia, i mianie padtrymlivajuć i ludzi, nie źviazanyja z prafiesijaj žurnalista, i žurnalisty, tamu što ja palityčny. Kali vychodzić čałaviek, jaki ździejśniŭ realnaje złačynstva, usio roŭna: kradziež, chulihanstva, rabavańnie, — kaho jon cikavić? Nikoha. Kamu jamu skardzicca?

Choć i nie mieli prava nad im ździajśniać takija dziejańni, nichto hetuju prablemu asabliva nie ŭzdymaje, bo jon złačyniec. Voś i ŭsio.

«Zona — heta mini-kopija dziaržavy»

Pavialičyć

— Kali vas sudzili, źjaviłasia infarmacyja, što inšym źniavolenym było zabaroniena z vami mieć znosiny. Ci praŭda heta? Jak było ŭładkavanaje vaša žyćcio ŭ źniavoleńni?

— Mabyć, kali ja tolki pryjechaŭ u kałoniju, prajšoŭ taki słych. Heta nie adpaviadaje rečaisnaści. Infarmacyju hetuju pieradali, skažam tak, vypadkova. Usio było narmalna.

Kali ja pryjechaŭ u kałoniju, u mianie byŭ vybar: albo pryniać praviły žyćcia ŭ kałonii i žyć tak, jak usie žyvuć, albo admovicca vykonvać hetyja praviły i adpravicca ŭ turmu. Prablem sa źniavolenymi ŭ mianie nijakich nie było. Naadvarot. Jašče da prychodu ŭ kałoniju ŭžo była infarmacyja ŭ ludziej, chto tudy jedzie. I narmalna mianie sustreli, padtrymlivali.

Tam sistema vybudavanaja takim čynam: treba žyć tak, kab nie pieraškadžać inšym ludziam. Tamu ja staraŭsia maksimalna, kab praź mianie ni ŭ koha prablem nie było.

— Za što kankretna vas sudzili pavodle artykułu 411 («Złosnaje niepadparadkavańnie administracyi kałonii»)?

— Usio prosta — pieranos vybaraŭ. Pieranieśli vybary, i mianie pabajalisia vypuskać u hety pieryjad jak pahrozu infarmacyjnaj biaśpiecy. Pryjšli, patłumačyli, skazali: «Vypuścić my vas, na žal, nie majem prava».

— Kałonija paŭpłyvała na vas?

— Zadača, jakuju ja pastaviŭ pierad saboj — ździejśnić revalucyju. Kab ździejśnić revalucyju, patrebnyja viedy pra ład hramadstva. Hetyja viedy možna atrymać na zonie, tamu što zona — heta mini-kopija dziaržavy. Albo, kali my voźmiem, naprykład, Ministerstva adukacyi, prajści šlach ad nastaŭnika da ministra.

U Biełarusi čałaviek, jaki projdzie šlach ad nastaŭnika da ministra i stanie ŭ dadzieny momant ministram Respubliki Biełaruś — heta niahodnik, na jakim klajma niama dzie stavić. Tamu takaja daroha nie padychodzić. Ja vybraŭ bolš karotki šlach atrymańnia hetych viedaŭ — u kałonii.

«Pryjšło rasparadžeńnie ad ministra, kab my zrabili vam drenna»

Pavialičyć

— Jak u vas było z dostupam da infarmacyi ŭ źniavoleńni? Ci dachodziła da vas niešta pra rasiejskuju ahresiju suprać Ukrainy ci pra realny stan spraŭ u Biełarusi?

— U mianie ź infarmacyjaj na zonie było ŭsio vydatna, tamu što mianie infarmavali asudžanyja, supracoŭniki kałonii, časam ja naviedvaŭ pakoj dla prahladu televizara, ale vielmi redka, tamu što tam prapahanda. Ale kali mnie treba było vyśviatlać iścinu, ja słuchaŭ ich, razumiejučy, što toje, što kažuć jany, u realnaści naadvarot. Tamu ja absalutna infarmavany i pra trahiedyju, fašyscki napad Pucina na Ukrainu, i pra ŭsie inšyja padziei. I ŭ mianie jasny na heta pohlad, jasnyja maje dalejšyja dziejańni.

— Davoli niezvyčajna čuć, što vam niešta paviedamlali navat supracoŭniki kałonii.

— Vielmi mnohija supracoŭniki kałonii byli padpisanyja na moj kanał, hladzieli maje filmy. Pierakanańni maje padzialali, tamu ŭ hetym było praściej. Składaniej było ŭ tym, što mučyć mianie zahadvaŭ čałaviek, jaki niezakonna nazyvaje siabie ministram unutranych spraŭ, Ivan Kubrakoŭ.

— Asabista?

— Viadoma, kali jon pieradavaŭ zahady, to da mianie prychodzili supracoŭniki kałonii, kazali «Mikałajevič, tut pryjšło rasparadžeńnie ad ministra, kab my zrabili vam drenna. My hetaha nie chočam, tamu davajcie ŭsio zrobim pryhoža, ale tolki na papiery». U bolšaści vypadkaŭ tak i było. Ja rady, što mianie papiaredžvali pra bolšaść pravakacyj z boku kiraŭnictva MUS, i była mahčymaść ad hetaha syści z najmienšymi stratami.

Previentyŭny nahlad možna abyści

— Paśla vyzvaleńnia vy prabyli na voli ŭ Biełarusi krychu bolš, čym paŭtara miesiaca. Kali i jak vy vyrašyli, što budziecie źjazdžać u Litvu?

— Ja kankretna kažu, što ja vyzvaliŭsia dziela taho, kab skončyć revalucyju ŭ Respublicy Biełaruś. Mirnuju revalucyju biez hramadzianskaj vajny. Maja zadača nie dazvolić hramadzianinu Łukašenka ŭciahnuć našu krainu ŭ vajnu.

U Biełarusi nad majoj metaj z abjektyŭnych pryčyn pracavać niemahčyma. Tamu što luby čałaviek, jaki budzie aktyŭna dziejničać u Biełarusi, budzie nieadkładna aryštavany i źmieščany ŭ kałoniju. Tamu nieabchodna było časova vyjechać z terytoryi Radzimy.

— Vy spakojna zjechali ci vam daviałosia biehčy, bo siłaviki kantralujuć byłych palitviaźniaŭ?

— Ja jak juryst viedaju niekatoryja ščyliny ŭ zakanadaŭstvie. Ja vyjazdžaŭ «pa-biełamu». Paśla vyzvaleńnia na mnie byŭ previentyŭny nahlad, jaki pryznačyŭ sud. Hety nahlad nakładaje na mianie abmiežavańni, jakimi ja ŭ vyniku skarystaŭsia.

Pavodle ich [biełaruskich uładaŭ. — Red.] zakanadaŭstvu mnie zabaroniena pakidać miežy rajonu biez dazvołu orhana ŭnutranych spraŭ. Ale pry źmienie miesca žycharstva dapuščalna vyjazdžać za miežy rajonu. Ja napisaŭ zajavu, što ja mianiaju miesca žycharstva.

Jurydyčna admović mnie nie mahli, bo heta maja ŭłasnaść, dom. Ja maju prava ŭ jaho pierajazdžać. Tak mnie zrabili dakumient ź piačatkaj MUS, na padstavie jakoha ja mahu pakidać svoj rajon. I ŭ vyniku ja pakinuŭ i rajon, i Respubliku Biełaruś.

— U vas nie było prablem na miažy?

— Nijakich.

«Alaksandra Ryhoraviča nienavidziać usio hetak ža»

Pavialičyć

— U Biełarusi na voli ŭsio, jak na zonie. Zona — heta mini-kopija dziaržavy. Alaksandr Ryhoravič dla bolšaści adekvatnych hramadzian pieratvaryŭ pražyvańnie ŭ Biełarusi ŭ kašmar.

U 2025 hodzie vielmi mocna prasieŭ zarobak na najbujniejšych pradpryjemstvach krainy. Mnie pisali rabotniki hetych pradpryjemstvaŭ, ź jakimi ja jašče byŭ znajomy da svajoj pasadki.

Alaksandra Ryhoraviča nienavidziać usio hetak ža, navat jašče bolš. Adzinaje adroźnieńnie — narod baicca vajny. Sutnaść u tym, što Alaksandr Ryhoravič i ciahnie nas u hetuju vajnu, ale, kali pryjdzie čas, jaho ž dziejańni ź im zhulajuć zły žart. I my darobim da kanca, mirna i biez vajny toje, što pavinny byli darabić u 2020 hodzie.

— Jak vam bačycca stanovišča biełarusaŭ, jakich vycisnuli za miažu?

— Na zonie dla ŭsich: i dla asudžanych, i dla supracoŭnikaŭ orhanaŭ unutranych spraŭ stvoranyja nievynosnyja ŭmovy. U vyniku čaho asudžanyja i supracoŭniki pačynajuć — skažu hrubaje słova — žerci adzin adnaho, stukać, danosić, nienavidzieć. Choć, kali razabracca, nichto ź ich adzin adnamu zła nie žadaje.

Dakładna hetak ža Alaksandr Ryhoravič sprabuje stvaryć takuju situacyju za miažoj, kab biełarusy, jakija, pa sutnaści, suprać adzin adnaho ničoha nie majuć, apynulisia straŭlenyja pamiž saboj. Kab ciažkija ŭmovy prymušali zrušyć svoj pohlad z realnaj našaj prablemy — Alaksandra Łukašenki — na inšyja, značna mienš značnyja prablemy. Usia zadača Łukašenki i jahonaha atačeńnia — zrabić z nas vorahaŭ.

— Kali vas aryštavali, jašče nie było takich ustojlivych struktur za miažoj: ni fondaŭ salidarnaści, ni Ofisu Cichanoŭskaj, APK i inšych. Jak vam zdajecca, my možam hanarycca tym, što majem, ci niešta było zroblena nie tak?

— Kožny čałaviek pracuje pa miery sił. I pierš za ŭsio kožny čałaviek pavinien samastojna pasprabavać acanić svaju dziejnaść. Na dadzieny momant ja tolki ŭvachodžu ŭ infarmacyjnuju prastoru, i kali ja lepš raźbiarusia ź situacyjaj, to ja heta prakamientuju.

«U mianie kankretnyja płany»

— Vy kažacie, što vam jasnyja vašy dalejšyja dziejańni. Taksama ŭ pieršaj publičnaj zajavie na voli vy skazali, što patrebnaja revalucyja, treba skončyć toje, što my nie skončyli ŭ 2020 hodzie. U vas jość bačańnie, jak heta zrabić? Ci realna heta ciapier?

— Nie sumniavajciesia, u mianie kankretnyja płany. Vy budziecie z hetymi płanami aznajomlenyja. Heta ŭsio ŭžo pačałosia. Vy ŭsie ŭbačycie kankretny płan i dziejańni, biez usialakich razmytych fraz «my za ŭsio dobraje, suprać usiaho drennaha».

— Nie padzialiciesia padrabiaźniej, choć by trochi?

— Usio paetapna. Usio budzie publikavacca na maim YouTube-kanale i praz žurnalistaŭ.

— U 2020 hodzie vy byli davieranaj asobaj Śviatłany Cichanoŭskaj na vybarach i viali błoh. Ciapier da błoha vy ŭžo viarnulisia, a jakija płany jašče? Ci dałučyciesia vy, naprykład, da kamandy Cichanoŭskaj?

— Kožny z tych, chto žadaje ažyćciavić pieramieny ŭ Biełarusi, pavinien rabić svaju pracu na svaim miescy. Na dadzieny momant ja znachodžusia na svaim miescy, i tuju častku pracy, jakuju na mianie ŭskładaje hramadstva, ja vykonvaju. A mienavita mnie nieabchodna pieradać tyja viedy, jakich u hramadstva nie było ŭ 2020 hodzie. Z dapamohaj hetych viedaŭ my zavieršym pracesy, jakija pačalisia tady.

— U zaviaršeńnie našaj hutarki vy chacieli b dadać jašče niešta važnaje?

— Sistema, jakuju stvaryŭ Alaksandr Łukašenka, sama siabie źjeła. Jaje zastajecca tolki dabić. Dumaju, mnohija ludzi bačyli videa, dzie hienierały dajuć spravazdaču pierad Alaksandram Łukašenkam pra hatovaść vojskaŭ da bajavych dziejańniaŭ. Na kankretnaje pytańnie ab tym, ci hatovaja armija vajavać i pieramahać, psieŭdahienierał sa spałochanym, zackavanym pohladam sprabuje z dapamohaj słovabłudstva skazać, što ŭsio dobra. Pryčym nie adkazvajučy kankretna na pytańnie, ci hatovyja sałdaty da vajny.

Dumaju, Łukašenka zdahadvajecca, što kali jon uciahnie krainu ŭ vajnu, to sałdaty nie buduć, jak aviečki, iści na miasnyja šturmy, a voźmuć aŭtamaty i pačnuć sami prosta na pole boju abo ŭ miescach dysłakacyi vojskaŭ pryhavorvać i pryvodzić u vykanańnie prysudy ŭ dačynieńni da asobaŭ, jakija, zachapiŭšy ŭ 2020 hodzie ŭładu, prysvoili sabie zvańni pałkoŭnikaŭ i hienierałaŭ. Narod nie pojdzie ŭ miasnyja šturmy dziela pałacaŭ synoŭ Łukašenki.

• 10
• 1
• 0
• 0
• 0
• 1
• 0
• 1