KDB prychodziŭ da rodnych jašče adnaho viciebskaha aktyvista. Praviali pieratrus
Papiaredzili, kab nie ŭdzielničali ŭ mierapryjemstvach da Dnia palitviaźnia.
U Biełarusi prajšła chvala pieratrusaŭ u svajakoŭ hramadskich aktyvistaŭ i pravaabaroncaŭ, jakija byli vymušany źjechać za miažu. Stała viadoma, što 21 maja supracoŭniki KDB prychodzili z vobšukam da rodnych viciebskaha aktyvista Dźmitryja Karniajenki.
Pra hety vizit i jaho sapraŭdnyja pryčyny aktyvist napisaŭ na svajoj staroncy ŭ Facebook: «Aficyjna — z nahody śviatkavańnia Dnia Voli. Nieaficyjna — kab u hety dzień nie vychodzili na žałobnyja mierapryjemstvy, pryśviečanyja Dniu palitviaźnia».
Pavodle słoŭ Karniajenki, padčas hetaha pieratrusu siłaviki ničoha nie zabrali.
Adnak jon adznačyŭ, što pradstaŭniki śpiecsłužbaŭ prychodziać da jaho blizkich u Biełarusi «jak na pracu». Rodnyja padviarhajucca pastajannamu cisku: naprykład, u baćki Dźmitryja ŭžo dvojčy prymusova brali ŭzor DNK.
U Biełarusi suprać samoha Dźmitryja Karniajenki raspačata niekalki kryminalnych spraŭ, a MUS uniesła jaho ŭ śpisy ŭdzielnikaŭ «ekstremisckich farmavańniaŭ» za dačynieńnie da prajekta «Chryścijanskaja vizija» i viciebskaj inicyjatyvy «Narodny deputat».
Pieratrus u svajakoŭ Karniajenki nie byŭ adzinkavym vypadkam. 21 maja siłaviki zładzili masavy rejd pa rodnych tych biełarusaŭ, chto znachodzicca ŭ emihracyi i zajmajecca pravaabarončaj ci hramadskaj dziejnaściu. Siarod inšaha, vobšuk prajšoŭ i ŭ svajakoŭ pravaabaroncy Pravaabarončaha centra «Viasna» Uładzisłava Łabkoviča.
Kamientary