Jeŭrapiejskaja fiederacyja himnastyki źniała ŭsie abmiežavańni ź biełaruskich i rasijskich atletaŭ
Vykanaŭčy kamitet Jeŭrapiejskaj fiederacyi himnastyki pryniaŭ rašeńnie ab poŭnym źniaćci abmiežavańniaŭ na ŭdzieł spartoŭcaŭ ź Biełarusi i Rasii ŭ spabornictvach. Hetamu papiaredničaŭ anałahičny krok z boku suśvietnaj kirujučaj struktury ŭ hetym vidzie sportu. Nieŭzabavie novy paradak pavinien być aficyjna ratyfikavany.
Jak paviedamlajecca ŭ aficyjnym kamiunikie arhanizacyi, 21 maja adbyłosia pazačarhovaje anłajn-pasiadžeńnie vykanaŭčaha kamiteta Jeŭrapiejskaj fiederacyi himnastyki. Paśla abaviazkovych 48 hadzin dla elektronnaha hałasavańnia było vyrašana prytrymlivacca pazicyi Mižnarodnaj fiederacyi himnastyki (World Gymnastics) i skasavać usie abmiežavańni, jakija prymianialisia da spartoŭcaŭ ź dźviuch krain. Śpiecyjalnyja praviły, što rehulavali ich udzieł raniej, nieadkładna stracili moc. Čakajecca, što ŭ chutkim časie hetaje rašeńnie budzie kančatkova zaćvierdžana na pazačarhovaj anłajn-hienieralnaj asamblei.
Rašeńnie jeŭrapiejskaj struktury abapirajecca na pastanovu Mižnarodnaj fiederacyi himnastyki, pryniatuju 17 maja na vykankamie ŭ Šarm-eš-Šejchu. Tady suśvietnaja arhanizacyja dazvoliła biełarusam i rasijanam vystupać na turnirach z nacyjanalnymi ściahami i himnami. Hetyja źmieny raspaŭsiudžvajucca na spartyŭnuju i mastackuju himnastyku, skački na batucie, akrabatyku, a taksama aerobiku. Nahadajem, što paśla poŭnaha adchileńnia ad spabornictvaŭ u 2022 hodzie, z 2024‑ha pradstaŭniki Biełarusi i Rasii mahli ŭdzielničać u turnirach World Gymnastics vyklučna ŭ niejtralnym statusie.
Pieršymi mahčymaściu vystupić biez abmiežavańniaŭ zmohuć skarystacca pradstaŭniki spartyŭnaj akrabatyki na bližejšych etapach Kubka śvietu. Spabornictvy projduć u Bałharyi i Azierbajdžanie ŭ pieryjady z 29 pa 31 maja, z 5 pa 7 červienia i z 19 pa 21 červienia. Himnastyčnyja arhanizacyi praciahvajuć ahulnuju tendencyju ŭ mižnarodnym sporcie. Raniej pra poŭnaje adnaŭleńnie pravoŭ atletaŭ ź Biełarusi ŭžo abviaścili Mižnarodny sajuz sučasnaha piaciborja, Suśvietnaja baksiorskaja arhanizacyja, Mižnarodnaja fiederacyja valejboła, Abjadnany śviet baraćby, Mižnarodnaja fiederacyja konnaha sportu i Suśvietnaja fiederacyja łučnikaŭ.
Kamientary