Rasija straciła na vajnie va Ukrainie bolš za 23 tysiačy adzinak techniki
Hetyja kansiervatyŭnyja padliki OSINT-prajekta Oryx, jaki fiksuje tolki vizualna dakazanyja straty, razburajuć mif pra «druhuju armiju śvietu».
Prajekt Oryx praciahvaje vieści padrabiazny ŭlik rasijskich strat, abapirajučysia vyklučna na fota– i videadokazy, što robić ich statystyku adnoj z samych nadziejnych u adkrytych krynicach. Jak paviedamlaje vydańnie The Insider, jakoje praanalizavała apošnija danyja, ahulnyja paćvierdžanyja straty Rasii ŭžo pieravysili 23 tysiačy adzinak roznaj techniki.
Najbolšyja straty prypali na braniatankavyja vojski, jakija niezvarotna stracili 4390 tankaŭ i 6429 bajavych mašyn piachoty. Da hetaha śpisa varta dadać 730 bronietransparcioraŭ i amal 2400 inšych raznastajnych bajavych braniravanych mašyn.
Nie mienš adčuvalnyja straty paniesieny i ŭ inšych rodach vojskaŭ. Sistema supraćpavietranaj abarony straciła 416 kompleksaŭ, a vyviedka — 130 radyjołakacyjnych stancyj. U pavietry rasijskaja armija straciła 184 samaloty i 175 viertalotaŭ. Navat vajenna-marski fłot, jaki tearetyčna nie pavinien byŭ sutykacca z surjoznym supracivam na mory, niezvarotna straciŭ 33 karabli i padvodnyja łodki.
Aŭtary prajekta zaŭsiody padkreślivajuć, što ich śpis — heta tolki samaja kansiervatyŭnaja acenka realnaha stanu rečaŭ, bo ŭ jaho nie traplaje technika bieź vizualnaha paćvierdžańnia. Kožny zapis staranna praviarajecca na pradmiet dublavańnia, a dla kožnaj adzinki techniki paznačajeccm jaje dakładny status: źniščana, paškodžana, kinuta ci zachoplena.
Maštab rasijskich strat akazaŭsia nastolki vialikim, što sutyknuŭsia ź niečakanymi techničnymi abmiežavańniami. Jak paviedamiŭ adzin z aŭtaraŭ prajekta Jakub Janoŭski, ahulny śpis dasiahnuŭ maksimalnaha pamieru artykuła, jaki dazvalaje publikavać płatforma Blogger. Kab časova vyrašyć prablemu, daśledčykam daviałosia skaračać mietadanyja hipierspasyłak na dokazy.
Kamientary