IT-hihanty masava zvalniajuć supracoŭnikaŭ, kab apłacić vykarystańnie štučnaha intelektu
Honka ŭ śviecie štučnaha intelektu patrabuje achviar, i imi stanoviacca sami stvaralniki technałohij. Za pieršyja miesiacy 2026 hoda suśvietnyja IT-hihanty ŭžo zvolnili bolš za 100 tysiač supracoŭnikaŭ, ahresiŭna aptymizujučy vydatki dziela šmatmiljardnych inviestycyj u niejrasietki.
Pra tryvožnuju tendencyju ŭ technałahičnym siektary piša partał Techspot, na što źviarnuŭ uvahu telehram-kanał «Bel-Geek.com». Pavodle danych analityčnaha partała TrueUp, jaki adsočvaje zvalnieńni ŭ industryi, kolkaść skaračeńniaŭ z pačatku hoda pieravysiła adznaku ŭ 100 tysiač čałaviek.
Statystyka pakazvaje, što praces nabyvaje sistemny charaktar: u kožnym miesiacy, za vyklučeńniem krasavika, pracu stračvali bolš za 20 tysiač śpiecyjalistaŭ.
Ad Meta da PayPal: chto płacić za revalucyju
Najbujniejšuju chvalu skaračeńniaŭ za apošni miesiac uznačaliła kampanija Meta, jakaja ŭziała kurs na pieraŭtvareńnie ŭ «AI-first company». Karparacyja płanuje zvolnić kala 8 tysiač supracoŭnikaŭ, kab častkova kampiensavać rost vydatkaŭ na štučny intelekt, jakija sioleta pieravysiać 100 miljardaŭ dołaraŭ.
Adnačasova z hetym jašče kala 7 tysiač pracoŭnych miescaŭ mohuć pieraaryjentavać na roli, źviazanyja niepasredna z AI. Ironija situacyi palahaje ŭ tym, što navučać svaje sistemy kampanija źbirajecca, adsočvajučy aktyŭnaść ułasnych supracoŭnikaŭ na pracoŭnych miescach, što mnohija ź ich užo nazvali «nievierahodna demaralizujučym».
Śledam idzie Cisco, jakaja niadaŭna abviaściła pra zvalnieńnie 4 tysiač čałaviek. Kiraŭnik kampanii Čak Robins pasprabavaŭ padać hetuju ličbu jak aptymistyčna nizkuju, patłumačyŭšy, što inviestycyi ŭ infrastrukturu štučnaha intelektu dazvolać nie zastacca za bortam hłabalnaha technałahičnaha pieraŭzbrajeńnia.
Płany PayPal vyhladajuć nie mienš ambicyjna. Pavodle infarmacyi The Wall Street Journal, kampanija imkniecca skaracić kala 20% svajho piersanału na praciahu nastupnych dvuch-troch hadoŭ, što moža skłaści amal 4800 čałaviek.
A voś kiraŭnictva kampanii Intuit, skaraciŭšy 3 tysiačy pracoŭnych miescaŭ, abo 17% svajho štatu, pasprabavała zachavać tvar, zajaviŭšy, što hetyja zvalnieńni nibyta «nie źviazanyja z AI», a źjaŭlajucca častkaj ahulnaj aptymizacyi.
Nie tolki štučny intelekt
Choć mienavita inviestycyi ŭ štučny intelekt źjaŭlajucca hałoŭnym drajvieram masavych zvalnieńniaŭ, insajdary haliny adznačajuć i inšyja faktary. Svaju rolu adyhryvajuć nastupstvy praźmiernaha najmu piersanału ŭ minułyja hady i ahulnaja pierabudova biznes-madelaŭ.
Asobnym bolem dla rynku stali prablemy ŭ industryi videahulniaŭ. Tak, studyja Quantic Dream niadaŭna zvolniła kala 95 supracoŭnikaŭ paśla pravału svajho prajekta Spellcaster Chronicles. Kampanija Bungie taksama płanuje značnyja skaračeńni, paćvierdziŭšy, što červieńskaje abnaŭleńnie dla papularnaj hulni Destiny 2 stanie apošnim, a raspracoŭka treciaj častki pakul navat nie pačynałasia.
Historyja technałahičnaha prahresu zaŭsiody była historyjaj aptymizacyi, ale nikoli raniej maštab nie byŭ takim hłabalnym, a terminy — takimi ścisłymi. Štučny intelekt, jaki pavinien byŭ vyzvalić čałaviectva ad ruciny, pačaŭ z taho, što vyzvalaje jaho ad pracoŭnych miescaŭ.
Pavodle prahnozaŭ analitykaŭ, u 2026 hodzie kolkaść zvolnienych u technałahičnym siektary moža dasiahnuć 370 tysiač čałaviek, i hetaja chvala budzie tolki narastać. Hałoŭnaje pytańnie zastajecca adkrytym: ci zdolnaje hramadstva, jakoje tak apantana imkniecca da technałahičnaj sinhularnaści, prapanavać štości miljonam ludziej, jakija apynucca za bortam hetaj novaj ekanamičnaj realnaści?
Kamientary