U Minsku nakryjuć naviesami ŭsie vychady z padziemnych pierachodaŭ
U Minsku płanujuć abstalavać naviesami ŭsie adkrytyja vychady z padziemnych piešachodnych pierachodaŭ. Prajekt zakranie 112 vychadaŭ na 34 abjektach, jakija ciapier nie majuć abarony ad apadkaŭ, paviedamlaje ahienctva «Minsk-Naviny».
Budaŭniča-mantažnyja raboty pačnucca ŭžo ŭ 2026 hodzie. Pieršymi naviesy źjaviacca na praśpiektach Niezaležnaści, Pieramožcaŭ i Partyzanskim, paśla čaho raboty praciahnucca ŭ žyłych rajonach horada.
Pa słovach kiraŭnika ŭpraŭleńnia darožna-mastavoha budaŭnictva i ŭparadkavańnia Uładzimira Łatuškina, adkrytyja leśvicy pastupova razburajucca pad uździejańniem nadvorja. Im škodziać śnieh, hałalod, miechaničnaja ačystka, a taksama daždžavaja vada, jakaja traplaje ŭ pierachody z boku prajeznaj častki.
Dla vyrašeńnia hetaj prablemy raspracavany typavy prajekt naviesaŭ ź mietaličnych kanstrukcyj i škła. Takija naviesy pavinny zabiaśpiečyć dobruju bačnaść i adnačasova abaranić leśvicy ad apadkaŭ.
Zaviaršyć raboty na praśpiekcie Pieramožcaŭ płanujuć da kanca 2026 hoda, a poŭnaja realizacyja prajekta raźličanaja na niekalki hadoŭ.
Haradskija ŭłady adznačajuć, što naviesy dapamohuć nie tolki źnizić vydatki na ŭtrymańnie padziemnych pierachodaŭ, ale i dazvolać pavysić biaśpieku i kamfort dla piešachodaŭ. Čakajecca, što dziakujučy im na prystupkach budzie mienš vady i lodu, a ludzi zmohuć karystacca pierachodami ŭ bolš zručnych umovach padčas daždžu i śniehapadaŭ.
Ciapier čytajuć
«Spasibo, Lena! Prodołžajtie viesti nabludienije». Aficer, jaki pisaŭ Charysavaj, paśviŭsia ŭ čatach palitemihracyi, a niekatorym dziaŭčatam navat prapanoŭvaŭ abmianiacca niudsami21
Kamientary