«Называлі прастытуткай». Піяршчыца напісала кампліментарную калонку пра Марыю Васілевіч — і атрымала рэакцыю ў сацсетках
Піяршчыца Ганна Мірочнік апублікавала калонку на партале Tut.by пад гучным загалоўкам «Феномен Марыі Васілевіч. Чаму мы не любім прыгожых і паспяховых». У ёй пра тое, як несправядліва цкуюць міс Беларусь праз яе знешнасць і адмаўляюцца паверыць, што мілавідная дзяўчына можа ўсяго дасягнуць сама.
«Колькасць памыяў, якая вылілася за апошнія пару месяцаў на «нашу прыгажуню», заслугоўвае статусу сацыяльнага феномена. І пакуль лаялі Васілевіч, не заўважылі, што ў яе, апроч знешнасці, ёсць добрая адукацыя, размоўная ангельская і жаданне дапамагаць тым, хто ў гэтым мае патрэбу», — піша Ганна Мірочнік.
Яна дадае, што ў Еўропе, дзе маладыя асобы займаюць высокія дзяржаўныя пасты, гэта нікога не бянтэжыць.
«Марыя нявольна трапіла ў цэлы шэраг балючых месцаў: стала першай прыгажуняй краіны, зрабіла афіцыйную ўладу саюзнікам, а не супернікам, працягнула весці сябе як прыгожая жанчына і пры гэтым засталася даступнай для дыялогу», — піша яна пра спадарожніцу Аляксандра Лукашэнкі.
Пасля гэтай калонкі абураныя і не згодныя з меркаваннем чытачы пачалі атакаваць піяршчыцу ў сацыяльных сетках.
«Народ, я ж не ваша мама — мне напляваць, чым канкрэтна вас не задаволіў матэрыял. А загаджаныя незнаёмымі людзьмі асабістыя паведамленні адцягваюць ад працы», — выказалася Ганна Мірочнік у сябе на старонцы.
«Быў калектыўны набег, які дайшоў нават да забытага профілю ў «Аднакласніках», — дзеліцца яна з «НН». — Пішуць рознае. Асноўны пасыл: «Як сумна, што мы ўсе непрыгожыя і сталыя. Эх, куды нам». Некаторыя давалі парады, як зрабіць тэкст цікавейшым і «глыбейшым». А я вельмі не люблю, калі парадамі дзеляцца без запыту.
Што тычыцца бруду, то прастытуткамі называлі і мяне, і Марыю. Гэтыя каментатары пайшлі ў бан адразу, іх допісы я зацерла. У мяне на старонцы трэба выбіраць фармулёўкі, не хачу з яе рабіць трыбуну для чужога хамства».
Яна таксама тлумачыла, што персона Васілевіч была прыведзена для нагляднасці — на яе месцы магла апынуцца любая, «для гэтага не абавязкова збіраць кавуны і танчыць з прэзідэнтам».
Аб публікацыі піяршчыца не шкадуе.
«Я ж вопытны спецыяліст, ведала, як будзе «прыгараць». Так і выйшла».
Каментары