«Не так фармулявала пытанні да сведкі на судзе». Чаму адвакатку Бабарыкі адхілілі ад працы?
У кастрычніку дваіх адвакатаў Віктара Бабарыкі — Наталлю Мацкевіч і Яўгена Пыльчанку — адхілілі ад працы. Мінюст пачаў супраць іх дысцыплінарную вытворчасць.
«Адначасова з гэтым яшчэ да разбіральніцтва абое адвакаты раптоўна былі адхілены ад сваёй працы. Падставы, якія выкарыстаны для пачатку дысцыплінарных вытворчасцяў, абсалютна абсурдныя і смешныя.
Напрыклад, Мацкевіч ставяць у віну, што яна неяк не так фармулявала пытанні да сведкі на судовым пасяджэнні», — расказаў на брыфінгу экс-адвакат Дзмітрый Лаеўскі.
На гэтым тыдні Мінская калегія адвакатаў разгледзіць пытанне адносна ліцэнзіі Наталлі Мацкевіч і Яўгена Пыльчанкі.
Агулам ужо чатырох адвакатаў Бабарыкі адхілілі ад працы. Аляксандр Пыльчанка ў кастрычніку 2020-га быў пазбаўлены ліцэнзіі, Дзмітрыя Лаеўскага выключылі з калегіі адвакатаў у ліпені. На цяперашні момант у Бабарыкі не засталося абаронцаў.
«Звязаць гэта з чымсьці, акрамя як з асобай самога падабароннага, вельмі цяжка», — каментуе Дзмітрый Лаеўскі.
Адвакаты, якія працягваюць сваю дзейнасць у Беларусі, у крохкім становішчы.
«Умовы лета 2020 года і цяперашнія для выказвання свайго меркавання ў адвакатуры істотна адрозніваюцца. Тады таксама былі высокія рызыкі выказвання свайго меркавання, але было адчуванне магчымасці пачатку трансфармацыі ў грамадстве. Сёння як мінімум няма такога адчування, калі казаць пра найбліжэйшую перспектыву. Мінюст валодае бязмежнымі паўнамоцтвамі, — кажа Дзмітрый Лаеўскі і называе прычыны, чаму яго калегі вырашаюць маўчаць:
— Або яны хочуць паспрабаваць максімальна быць карыснымі сваім кліентам і не рызыкаваць, або хтосьці проста кіруецца тым, што хоча працаваць, атрымліваць годны заробак за пэўны аб’ем працы. Хоць гэта не значыць, што яны не падтрымліваюць у душы каштоўнасць свабоды прафесіі і нейкую карпаратыўнасць».
Чытайце таксама:
Як справы ў Віктара Бабарыкі? Ягоны штаб расказаў апошнія навіны
Беларускія рэпетытары ў паніцы: праз праблемы «Яндэкса» яны могуць страціць матэрыялы, якія напрацоўвалі гадамі27
Каментары