«Таму што ў Беларусі прыкаліст павінен быць адзін». Слава Камісаранка з’ехаў ва Украіну. Яго папярэдзілі, што КДБ можа яго выкрасці
«Мяне аб’явіла ў вышук беларускае КДБ», — заявіў Слава Камісаранка на канцэрце ў Кіеве. Відэа з яго ён выклаў сёння на сваім канале.
«Вы думаеце, напэўна, за што? За жарты. Уяўляеце? Так, у звычайных краінах спецслужбы ловяць тэрарыстаў, а ў Беларусі — прыкалістаў. Таму што ў Беларусі прыкаліст павінен быць адзін», — пажартаваў ён.
Слава Камісаранка сказаў, што цяпер ён у бяспецы, з'ехаў ва Украіну.
Ён распавеў, як даведаўся пра небяспеку. Яму напісаў чалавек, «звязаны з пратэстамі».
«На жаль, ёсць інфармацыя з вартых даверу крыніц, што вас збіраюцца выкрасці ў Маскве і вывезці на машыне ў Беларусь. Праявіце асцярожнасць».
«І я такі: праявіце асцярожнасць? Быццам мне не ад КДБ трэба бегчы, а несці гарачую гарбату. Я не ведаю, як трэба праявіць асцярожнасць, каб цябе КДБ не ўзяў. Каб яны стаялі такія: «Я не разумею, гэта Камісаранка ці куст рэчы ў багажнік грузіць?»».
«Я напісаў гэтаму чалавку, — працягвае Камісаранка. — Няўжо іх не спыніць тое, што ў мяне ўжо ёсць расійскі пашпарт?»
«Я думаю, яны гэтага не ведаюць, — адказаў той. — Хутчэй за ўсё, яны паглядзелі ваша інтэрвʼю Дудзю і зразумелі, што ў вас няма расійскага пашпарта».
«Як я выдатна на інтэрвʼю схадзіў», — кажа Камісаранка. У інтэрв’ю Юрыю Дудзю ён распавёў, што ён купіў кватэру на Арбаце і што хоча атрымаць расійскі пашпарт.
«Ён жа [Дудзь] там гадзіну кажа, то-бок расійскага пашпарта ў цябе няма, то-бок атрымаеш ты яго няхутка, то-бок аптымальна хапаць цябе прама цяпер?» — жартуе Камісаранка.
«І беларускае КДБ такое: так, паехалі. Тут 850 км, мы да вечара яго ўжо прывязём».
На пытанні знаёмых, ці верыць Камісаранка у сцэнарый выкрадання, ён адказваў: «Яны самалёт пасадзілі, а мяне ў багажнік не змогуць пакласці?»
«Вы памятаеце, над Беларуссю пасадзілі самалёт, над Беларуссю цяпер ніхто не лётае, таму што ў нас прэзідэнт авіяпірат. Белавія цяпер першая ў свеце пешаходная авіякампанія. Выжывае чыста з-за аўтобусаў да самалётаў», — кпіць Камісаранка.
Выказаўся Слава і пра пасадку самалёта RyanAir — як тэрарысты прыслалі паведамленне аб захопе самалёта на электронную пошту.
«Ну чыста ў стылі тэрарыстаў, на пошту пісаць. Там яшчэ тэма ліста, напэўна, была «Непрыемнасць на борце». Я ў гэта паверыць не мог. Сурʼёзна? Гэта ваша найлепшая версія? Калі гэта ваша найлепшая версія, я б хацеў паслухаць тыя, якія вы не ўзялі.
Першая версія. Пілот захацеў «папісяць», а прыбіральні былі занятыя?
Другая версія. Самалёт сеў таму, што стаміўся? І трэцяя: таму што тэрарысты напісалі на пошту. Шкада, што нельга ўзяць усе тры».
Камісаранка адзначыў у выступе, што не зразумеў, чаму менавіта цяпер на яго раззлаваліся беларускія сілавікі:
«Магчыма, іх раззлавала гутарка ў Дудзя, магчыма, мой сольны канцэрт, я гэтага не ведаю. Але вось вам цікавы факт.
Калі ў мяне выйшаў канцэрт, ён патрапіў на першае месца ў трэндах Youtube, а ў гэты час у Лукашэнкі выйшла інтэрвʼю для ВВС. І яно было на 8-м месцы ў трэндах. На пачатку года ў мяне выйшаў маналог пра Чык-чырыка, а ў Лукашэнкі — навагодняе віншаванне. І маналог быў на першым месцы, а віншаванне — на 7-м. І штосьці мне падказвае, народ, што Лукашэнка ненавідзіць мяне як ютубер ютубера».
Комік распавёў, што знаёмы яму параіў наняць прыватнае ахоўнае прадпрыемства, каб, калі нападуць кадэбэшнікі, ахоўнікі яго адбілі.
«Я б ніколі не адважыўся, але многае б аддаў, каб на гэта паглядзець. Самае галоўнае — не пачаць думаць: найму дзесяць «чопаў» і пайду ў атаку сам », — смяецца Камісаранка.
Ён пажартаваў, што на самай справе, перахапіў перамовы Майка і Ніка.
«Да вечара даставім яго ў Мінск, але гэта будзе няпроста, таму што Камісаранка аказаўся моцным арэшкам. Так, які ён прыгожы і сэксуальны. І здаецца, цяпер ні з кім не сустракаецца», — зачытвае комік выдуманы дыялог.
Пакуль Камісарэнка спыніўся ў Кіеве.
«Да беларусаў усюды ставяцца добра. Іх не любяць толькі ў Беларусі», — кажа ён.
У сябе ў Instagram Камісаранка дадаў, што «зʼехаў, як аказалася, не дарма, кдбшнікі мабыць стаміліся хадзіць у пошуках мяне па Арбаце, і вырашылі мне патэлефанаваць. Тэлефанавалі, пісалі смскі, праўда, зайсці да мяне ў Instagram, каб убачыць дзесяць афіш з Кіева і зразумець, што я не ў Маскве, не здагадаліся. Мне спатрэбіўся нейкі час, каб напісаць пра гэтыя падзеі жарты, так бы распавёў усё крыху раней. Веру, што ўсё будзе добра, як заўсёды верыў да гэтага!».
«Развучыцца жартаваць або паціснуць руку Лукашэнку?» — «Развучыцца жартаваць». Комік Слава Камісаранка даў інтэрв'ю Дудзю
«Усе вашы мары павінны быць узгодненыя з адміністрацыяй раёна». Як у Беларусі караюць за жарты
Памерла 39-гадовая экс-палітзняволеная Ганна Кандраценка. У калоніі ў яе знайшлі рак, але не вызвалілі27
Каментары