Шмат у якіх краінах свету цяпер адмаўляюцца ад абавязковага нашэння масак. Беларусы, адчуваецца, таксама ад гэтага стаміліся, тым больш што мы ўжо не знаходзімся на піку пандэмічнай хвалі.
Але нават калі колькасць выпадкаў кавіду нізкая, ёсць група людзей, якім усё роўна маскі прынясуць карысць. Гэта тыя, хто пакутуе на алергію.
Шмат хто з алерголагаў падтрымлівае ідэю пастаянна насіць маскі як мінімум на вуліцы, калі ў паветры шмат пылку. Пра іх карысць сведчыць, напрыклад, даследаванне, праведзенае ў Ізраілі ў 2020 годзе, у якім удзельнічалі 215 медсясцёр. 42% з іх казалі, што пасля таго, як яны тыдзень насілі хірургічныя маскі і яшчэ тыдзень — рэспіратары N95, яны пачалі менш чхаць. Знізілася і вастрыня іншых сімптомаў сезонных алергій, піша Wall Street Journal.
Амаль любая маска з тых, што мы прывыклі выкарыстоўваць супраць кавіду, будзе абараняць алергікаў і ад часцінак пылку. Сярэдні памер такіх часцінак — 30-40 мікронаў, што нашмат больш віруснай часцінкі каранавіруса, памер якой складае менш за 10 мікронаў. Асабліва карысна для алергікаў насіць маскі ў ветраныя дні, тым больш што такі сродак абароны ад пылку дужа танны і не патрабуе рэцэпта ад доктара.
З іншага боку, не ўсе людзі ставяцца з разуменнем, калі бачаць чалавека ў масцы на вуліцы, бо мы прывыклі лічыць, што кавід лягчэй перадаецца ў памяшканнях. Але вопыт паказвае, што такі сродак ад алергіі сапраўды эфектыўны. Напрыклад, муж і трое дзяцей амерыканкі Джэкі Бойлан пакутуюць на алергію. І, як яна кажа, за два гады пандэміі і нашэння масак яны пачалі сябе адчуваць нашмат лепей і ўжо даўно не наведвалі свайго доктара.
Атрымалі бустар ад кавіду? Магчыма, больш вакцынавацца вам не трэба будзе
Хлопец, што правёў жыццё ў пластыкавым боксе. Сумная гісторыя
Цяпер чытаюць
Хлопца, які ў Лебедзевай хаяў Еўропу, асудзілі за ўдзел у пратэстах і ўхіленне ад войска2
Каментары