У Гродне пасля звароту прарасійскай актывісткі закрылі мастацкую галерэю «400 квадратаў»
У маі ў галерэі «400 квадратаў» пасля аднаго дня працы закрылі выставу сучаснай скульптуры. Прычынай стаў зварот актывісткі Вольгі Бондаравай. Гэтая падзея супала з заканчэннем дамовы арэнды з гандлёва-забаўляльным цэнтрам (ГЗЦ). Па словах прадстаўніка галерэі, цэнтр не захацеў яе працягваць.
«Я выказваю падзяку за год паспяховага супрацоўніцтва з адміністрацыяй Triniti. Вельмі шкада, што даводзіцца закрываць прыгожы праект, які прыносіў шмат радасці жыхарам горада, — распавёў прадстаўнік галерэі Hrodna.life. — Мы стараліся прывозіць актуальныя выставы і праводзіць мерапрыемствы для жыхароў горада на дабрачыннай аснове».
Галерэя праіснавала год. Там прайшла выстава-амаж, прысвечаная памерламу Захару Кудзіну. У галерэі выстаўляўся мастак Аляксандр Балдакоў. Праходзіла рэтраспектыўная выстава мастака-ілюстратара Паўла Татарнікава.
Што здарылася?
Падчас планавання выставы ці іншага масавага мерапрыемства арганізатар падае заяўку мінімум за два тыдні да пачатку ў адміністрацыю горада, распавёў прадстаўнік галерэі. Гэтак жа ён зрабіў і для выставы «Скульптура». Аднак у заяўцы быў няпоўны пералік аўтараў, бо да апошняга моманту склад удзельнікаў мяняўся «у сувязі з навінамі ў нашай краіне і ў суседзяў». Куратар выставы — Іван Арцімовіч — быў заяўлены адразу.
«Адразу ж пасля адкрыцця выставы спадарыня Бондарава адправіла зварот у гарвыканкам з просьбай аб закрыцці выставы, бо адзін з яе ўдзельнікаў, ён жа куратар, нібыта не адпавядае яе ўяўленням аб правільнай грамадзянскай пазіцыі і ўся выстава нібыта не адпавядае ўяўленням аб прыгожым спадарыні Бондаравай. Гэты зварот і няпоўны спіс удзельнікаў выставы сталі фармальнай прычынай для прыпынення яе працы і накіравання камісіі з адміністрацыі горада. Камісія прапанавала зняць большую частку работ, усумніўшыся ў іх мастацкай вартасці», — распавёў прадстаўнік.
Як гэта спрабавалі вырашыць?
«Беларускі саюз мастакоў» падаў ліст адміністрацыі і быў гатовы стварыць экспертную камісію з вядомых мастацтвазнаўцаў і скульптараў. Аднак гэтая прапанова, па словах прадстаўніка, не была пачутая адміністрацыяй. Тады ён з куратарам прынялі рашэнне аб закрыцці выставы.
«Паколькі ў выставе прымалі ўдзел прызнаныя скульптары, куратарам і галерэяй была праведзеная вялікая праца над канцэпцыяй, над цэльнасцю экспазіцыі, мы вырашылі, што пакідаць напалову зрэзаны праект ніжэй за нашу годнасць», — лічыць ён.
Гэтая выстава стала апошняй у галерэі — дамову арэнды не працягнулі. Раней аб прычынах закрыцця выставы «Скульптура» ні гарвыканкам, ні прадстаўнікі ГЗЦ не сталі гаварыць з рэдакцыяй.
Каментары