Наступніцы Чамаданавай дагэтуль не далі палкоўніка. А пасля скандалу са злівам базы работнікаў, відаць, і не дадуць
У канцы 2021-га на месца заўважнай прэс-сакратаркі Міністэрства ўнутраных спраў Вольгі Чамаданавай прыйшла Наталля Сахарчук. І выглядае, што яе кар'ера не ладзіцца.
Наталля Сахарчук, якая перайшла ў сталічную міліцыю з пасады начальніка прэс-службы брэсцкай міліцыі, з лістапада 2021-га так і не атрымала палкоўніцкіх пагонаў, хаця і працуе на «палкоўніцкай пасадзе».
Чытайце таксама: «Нават падначаленыя Чамаданавай адмовіліся». Што вядома пра Наталлю Сахарчук, якая стала прэс-сакратаркай МУС
«Не даюць, таму што не апраўдвае даверу. Ёй трэба быць, як Чамаданава: кідацца грудзямі на барыкады, лезці ва ўсе дзіркі, не баяцца хлусіць так, каб казалі «хоць у вочы сцы», адмываць імідж МУС у вачах грамадства, для чаго яе, уласна, і бралі», — сказаў нам адзін з калег Сахарчук.
«Магчыма, у яе былі нейкія касякі, вымовы. Вымова звычайна вешаецца на год, пасля чаго яна аўтаматычна здымаецца, калі толькі не адбываецца нейкіх унутраных «амністый», касякоў, у гонар Дня міліцыі, напрыклад.
Само навешванне вымовы не забараняе павышэння ў званні, але часта вымова — гэта нагода, каб часць, да якой прыпісаны чалавек, «забылася», «затупіла», ці зрабіла яшчэ нешта, у выніку чаго дакументы на падпісанне новых пагонаў не былі адпраўленыя, — гэта стандартныя практыкі», — дадаў суразмоўца.
Нядаўна ў інтэрнэт былі выпадкова выстаўленыя даныя афіцэраў, якія вядуць адзін з тэлеграм-каналаў, дзе публікуюць крымінал і відэа з рэпрэсаванымі. Міліцыянеры лічаць, што гэта таксама адаб'ецца на кар'еры Сахарчук.
Чытайце таксама: Міліцэйскі тэлеграм-канал, дзе публікуюць відэа з рэпрэсаванымі, выпадкова выдаў сваіх адмінаў
«Адно ведаю дакладна: пасля пра**бу службовага дакумента і адпаведнага артыкула ў недзяржаўнай прэсе ёй абавязкова павінны павесіць вымову, як кіраўніцы тых, хто гэта зрабіў. А таго, хто зрабіў, могуць звольніць ці, калі пашчасціць, панізіць у званні», — кажуць нам.
Нагадаем, адміністратары тэлеграм-канала «Обратная сторона» выпадкова запосцілі туды графік дзяжурстваў.
Выявілася, што структура, якая адказвае за вядзенне канала, які поўніцца матэрыяламі, што распальваюць варожасць па палітычнай, нацыянальнай і сэксуальнай прыкметах, а таксама матэрыяламі са знявагай гонару, годнасці і дзелавой рэпутацыі грамадзян, — гэта Упраўленне інфармацыі і грамадскіх сувязяў (УІГС) Міністэрства ўнутраных спраў. Падраздзяленне, якое за гэта адказвае, мае рускамоўную абрэвіятуру ОРІКС. Гэта новае падраздзяленне, назва, хутчэй за ўсё, расшыфроўваецца як аддзел па рабоце ў інфармацыйна-камунікацыйнай сферы ці аддзяленне па рабоце ў інтэрнэце і камунікацыйнай сферы.
Латушка абвяргае абвінавачанні ў харасмэнце ад дэлегаткі КР Карпушонак83
Каментары