«Уласнасць, грошы і ўлада — гэта тры кіты». Упершыню за доўгі час чыноўнік даволі горача публічна пярэчыў Лукашэнку
Міністр сельскай гаспадаркі і харчавання Ігар Брыло адстойваў пазіцыю пра неабходнасць надання ўраду права даваць ільготы прамысловым кампаніям, на якія вешаюць стратныя сельскагаспадарчыя прадпрыемствы.
«Вы хочаце далучыць калгасы, саўгасы да дзяржаўных прамысловых прадпрыемстваў. Я вам даручыў гэты працэс трымаць у полі зроку. І калі трэба ўнесці прапановы. Вы ўносіце прапановы? Каго сёння да каго будзем далучаць?» — на павышаным тоне спытаўся Лукашэнка.
«Аляксандр Рыгоравіч, са 127 вельмі складаных неплацежаздольных прадпрыемстваў практычна 117 знаходзяцца ў трох абласцях. Гэта Гомельская, больш за 50 прадпрыемстваў, Магілёўская і Мінская».
— У нас сістэма сёння ёсць?
— Крыху не такая.
— Мы сёння далучаем калгасы, саўгасы да прадпрыемстваў?
— Далучаем.
— Да прадпрыемства, прыватнікаў? Перадаём ці не перадаём? Чым вас не задавальняе гэтая сістэма?
— Мы такімі ўказамі не ствараем спрыяльных умоў для інвестара. Мы ўсяго толькі хочам для прадпрыемства, якое возьме на сябе нагрузку з СПК: яму стварыць гэтыя ўмовы. Вось гэтае асноўнае адрозненне. Таму 399-м, 253-м (указам), у нас былі ўмовы створаныя, толькі для прадпрыемстваў АПК, толькі для калгасаў», — даволі горача запярэчыў Брыло.
Лукашэнка выказаўся ў тым стылі, што міністр прапануе забраць у прэзідэнта права даваць ільготы сваім указам і перадаць гэтыя паўнамоцтвы ўраду.
«Я не разумею, я што, затармазіў нейкі працэс? — крычаў на міністра Аляксандр Лукашэнка. — Я не разумею, нашто вы ламаеце цяперашнюю сістэму. Што вас не задавальняе?»
«Гэты цяперашні ўказ, 399-ы, нам не дазваляе рэструктурызаваць доўг для галаўнога прадпрыемства, пачуйце, калі ласка», — не здаваўся міністр сельскай гаспадаркі.
У адказ Аляксандр Лукашэнка прыгразіў Брыло перадаць права падаваць хадайніцтвы на льготы з міністэрства і ўрада старшыням аблвыканкамаў.
«Уласнасць, грошы і ўлада — гэта тры кіты, гэта галоўнае ў любой краіне!» — павучаў Аляксандр Лукашэнка.
Увогуле, Лукашэнка на нарадзе выглядаў раздражнёным і прыдзіраўся да дакладаў па ўсіх пытаннях.
Відэа спрэчкі Лукашэнкі і Брыло апублікавалі лукашэнкаўскія СМІ. Магчыма, гэта мае прадэманстраваць, што дыскусія па пытаннях эканамічнай тактыкі ўсё яшчэ магчымая, тады як у большасці сфер жыцця ўжо не засталося прасторы для плюралізму.
-
Камандуючы ВПС: Колькасць замежных войскаў ля межаў Беларусі зменшылася, з краінамі НАТА ідзе ўзаемадзеянне
-
Беларуса ў жаданні абмежаваць паўсюдную рэкламу казіно падтрымала Мінгандлю. Але прапагандысты параілі яму «не лезці не туды»
-
У гарах Кыргызстана з дрона адшукалі целы зніклых беларускіх альпіністаў
У гарах Кыргызстана з дрона адшукалі целы зніклых беларускіх альпіністаў8
Каментары