Хто завозіць у Беларусь шакалад Ritter Sport, які трапіў пад лукашэнкаўскія «контрсанкцыі»?
Кампанія-імпарцёр шакаладу Ritter Sport зарэгістраваная на брата дзелавой партнёркі Сяргея Цяцерына. З ім яна неаднаразова лётала на адпачынак у кампаніі Аляксандра Лукашэнкі, піша «Беларускі расследавальніцкі цэнтр».
Іх крыніца з фуд-індустрыі Беларусі сцвярджае, што рэальна кантрабандай шакаладу займаецца кампанія Цяцерына «БелГлобалГарант». У бізнэс-колах у курсе, што яна атрымала эксклюзіўнае права на імпарт забароненага прысмака, але чыноўнікам пра гэта невядома.
Як цяпер завозяць Ritter Sport
У беларускія крамы вярнуўся нямецкі шакалад Ritter Sport. У продажы яго не было амаль увесь мінулы год праз так званыя «контрсанкцыі» на прадукцыю ЕС. Іх сваім асабістым указам увёў Аляксандр Лукашэнка, а затым зацвердзіў Савет Міністраў. У снежні 2022-га Міністэрства антыманапольнага рэгулявання і гандлю працягнула гэтую забарону яшчэ на паўгода. Але на паліцы шакалад вярнуўся, толькі падаражэў.
Гэта магло адбыцца дзякуючы нюансам «контрсанкцыйнага» заканадаўства. Імпартаваць у Беларусь забароненыя еўрапейскія прадукты ўсё яшчэ можна. Для гэтага трэба атрымаць спецыяльныя квоты ад МАРГ. Пад выглядам патэнцыйных імпарцёраў журналісты БРЦ патэлефанавалі ў міністэрства, каб даведацца, як атрымаць такі дазвол. Аднак там адказалі, што падобныя квоты пакуль не выдаюцца.
Выходзіць, шакалад Ritter Sport — гэта, паводле беларускіх законаў, кантрабанда. Хто ж імпартуе яго з Нямеччыны, парушаючы ўказ Лукашэнкі?
На кожнай упакоўцы — налепка «пастаўшчык «Лагістычная кампанія Усход».
Валодае гэтай кампаніяй нехта Аляксей Мацвееў.
Яго імя знайшлі ў спісах супрацоўнікаў кампаніі «БелГлобалСтарт» за 2020 год.
Фірмай з падобнай назвай — «БелГлобалТон» — валодае і кіруе яго сястра Таццяна Мацвеева.
Абедзве кампаніі заснаваў Сяргей Цяцерын, блізкі да Лукашэнкі бізнэсовец.
Менавіта Цяцерын калоў з Лукашэнкам дровы, абяцаючы сагрэць Еўропу, і падымаў з ім чарку гарэлкі за перамогу Арыны Сабаленкі на Australian Open. У 2021 годзе ён як «кашалёк» Лукашэнкі трапіў пад санкцыі ЕС.
Парушае «лагістычная кампанія Усход» і антыманапольнае заканадаўства. Журналісты патэлефанавалі ў фірму «Альфа-Дыстрыбуцыя», якая раней імпартавала Ritter Sport у Беларусь. Там распавялі, што перасталі ўвозіць нямецкі шакалад, як толькі ўвайшла ў дзеянне забарона беларускіх уладаў.
Ад крыніцы, якая працуе на буйнога імпарцёра прадуктаў харчавання ў Беларусі, журналісты даведаліся, што гэтая фірма — шырма, за якой стаіць «БелГлобалГарант», яшчэ адна кампанія Цяцерына. Той жа інсайдар паведаміў, што менавіта «БелГлобалГарант» атрымала эксклюзіўнае права на імпарт нямецкага шакаладу.
Журналісты звязаліся з «БелГлобалГарантам», і супрацоўнікі кампаніі сапраўды аказаліся ў курсе гандлю Ritter Sport.
Хто такая Таццяна Мацвеева?
У 2014 годзе Цяцерын і Лукашэнка амаль на два тыдні паляцелі на адпачынак у ААЭ. Кампанію ім склала Таццяна Матвеева — тая самая сястра ўладальніка «Лагістычнай кампаніі Усход», якая цяпер займаецца кантрабандай нямецкіх шакаладак у Беларусь.
У 2016 годзе Лукашэнка і Цяцерын адправіліся ў Доху, але асноўны час, падобна, зноў правялі ў Эміратах. Была на борце і Таццяна Мацвеева.
У 2014 годзе Мацвеева разам з Сяргеем Цяцерыным і Мікітам Шатром заснавала кампанію «БелГлобалТон». Фірма гандлявала мэбляй і прадметамі інтэр'еру.
Мацвеева займалася дызайнам як ІП. Менавіта ў яе «БелГлобалСтарт», іншая кампанія Цяцерына, замовіла распрацоўку фірмовага стылю кінабараў «Блокбастар».
Афармляла Мацвеева і бар «Свабоды, 4» у Мінску, які адкрыла дачка Сяргея Цяцерына і яе знаёмыя.
Яна ж займалася лазняй Цяцерына ў Александрыі, мяркуючы па электронным лісце, які журналісты знайшлі на Aleph.
БРЦ таксама знайшоў дакументы, паводле якіх Мацвеева планавала рэдызайн і перашыўку гардзін для кампаніі «Белнафтагаз» Аляксея Алексіна. А пасля павінна была паставіць ёй шторы амаль за $35 тысяч.
Пад кіраўніцтвам Мацвеевай кампанія «БелГлобалТон» адкрыла ўласную краму ў гандлёвым цэнтры «Трум» і заключыла дагаворы на пастаўку мэблі з Кітая на дзясяткі тысяч даляраў. Напрыклад, заказ у кітайскага брэнда Rich Collection абышоўся фірме ў $17 тысяч.
Аднак у апошнія гады «БелГлобалТон», мяркуючы па фінансавых справаздачах, вядзе даволі сціплую камерцыйную дзейнасць.
Расследаванне цалкам чытайце па спасылцы.
Цяпер чытаюць
На мітынгу ў Вільні затрымалі правакатара. А Ціханоўскі заявіў пра намер дабівацца сустрэчы з Зяленскім32
Каментары