Паглядзелі, якія сукенкі прапануюць беларускія дызайнеры і выбралі найлепшыя з іх.
У гэтым сезоне айчынныя брэнды прапануюць жаноцкія мадэлі з натуральных матэрыялаў — бавоўны і лёну. Засталося абраць сваё.
Lea Lea
Брэсцкі брэнд Lea Lea з'явіўся ў 2013 годзе і першапачаткова ўяўляў сабой невялікую дызайн-студыю. Сёння яна трансфармавалася ў вытворчасць поўнага цыкла — са сваім швейным цэхам і крэатыўнай камандай дызайнераў. Калекцыі брэстаўчан можна было ўбачыць на сусветных выставах fashion-індустрыі і паказах Belarus Fashion Week.
Гэтым летам Lea Lea прапануе дзяўчатам лёгкія рамантычныя ўборы. Напрыклад, гэтая сукенка выканана з тонкага баваўнянага батыста. У такой будзе камфортна нават у моцную спёку.
Холад
Сарафаны з італьянскага лёну прапануе брэнд «Холад». Дызайнерка адзначае, што гэтую мадэль можна насіць як з класічным, так і са спартыўным абуткам. Сукенка з двух пластоў натуральнага італьянскага шоўку таксама стане практычным набыццём — з ёй можна прыдумаць мноства цікавых камплектаў.
10 Motifs
Працягваем тэму льнянога адзення cукенкамi брэнда 10 Motifs. Дызайнерка маркі робіць акцэнт на камфорце і экалагічнасцi вырабаў, таму лён ідэальна падышоў для распрацоўкi летней калекцыi. Адзенне з гэтага матэрыялу не награваецца і заўсёды застаецца прахалодным — тое, што трэба для летняй спёкі.
Цікота
Аматаркам незвычайных рэчаў варта звярнуць увагу на сукенку з кантраснай устаўкай ад дызайнеркі Кацярыны Цікоты. Такая выдатна дапоўніць гардэроб актыўнай гараджанкі. Гэты ўбор падыдзе як для звычайнай прагулкі, так і для сустрэчы з сябрамі ці паходу ў офіс, калі ваш працоўны дрэс-код дазваляе вольны стыль.
Наташа Цуран
У гродзенскай дызайнеркі Наташы Цуран можна купіць незвычайную кароткую сукенку ў стылі бэйбі-дол. Каб не перабраць з «дзіцячасцю» і не зрабіць вобраз саладжавым, рэкамендуем насіць яе з брутальным або спартовым абуткам.
Historia Naturalis
Адчуць сабе лясной феяй можна ў сукенцы з лёгкага віскознага палатна брэнда Historia Naturalis. Модны дызайн і незвычайны крой гэтага ўбору адразу ж вылучыць вас з натоўпу.
Kardash
Ільняную максі-сукенку з тонкай вышыўкай рышэлье, кішэнямі ў бакавых швах і адкрытай спінкай прапануе дызайнерка Вольга Кардаш.
Elema
Мы не маглі абысці бокам і мастадонта беларускага моднага рынку — «Элему». На сайце маркi мы знайшлі сукенку, якая вартая ўвагі: убор на тонкіх шлейках выкананы з сумесі бавоўны з эластанам — такая тканіна практычна не мнецца, а таму зручная ў нашэнні. Асабліва добра глядзіцца мадэль у чорным колеры — такую можна насіць не толькі ўлетку, але і ў халодную пару, спалучаючы яе з кашулямі і гольфамі.
Каментары
Ці вярнуўся той дзеяч з 10Motifs да жонкі ў выніку, можа хто ведае?