Прэзідэнт Фінляндыі назваў прычынай уцечкі на газаправодзе знешняе ўздзеянне. Магчыма, гэта была дыверсія
Прэзідэнт Фінляндыі Саўлі Нійнісцё паведаміў, што прычынай уцечкі на фінска-эстонскім газаправодзе Balticconnector стала «знешняе ўздзеянне». Ён удакладніў, што ў расследаванні абставінаў здарэння будуць удзельнічаць прадстаўнікі НАТА. Па інфармацыі Bloomberg, інцыдэнт стаў вынікам дыверсіі, піша «Коммерсант».
«Шкода, нанесеная падводнай інфраструктуры, была ўспрынятая сурʼёзна. Цалкам верагодна, што пашкоджанне газаправода і тэлекамунікацыйнага кабеля зʼяўляецца вынікам знешняга ўздзеяння», — падкрэсліў спадар Нійнісцё.
Разгерметызацыя адбылася на ўчастку трубы ў тэрытарыяльных водах Фінляндыі, кажа адна з крыніц Bloomberg. Аператары заўважылі «незвычайнае» падзенне ціску, пасля чаго трубаправод быў перакрыты. Bloomberg удакладняе, што на фоне надзвычайнага здарэння цэны на газ у Еўропе з нядзелі выраслі на 12%.
Агенцтва мяркуе, што, нягледзячы на адсутнасць афіцыйных каментароў, следства як асноўную версію разглядае менавіта дыверсію.
Balticconnector — марскі газаправод паміж фінскім горадам Інка і эстонскім Палдыскі, які злучае газавыя сеткі дзвюх краін. Трубаправод дае Фінляндыі доступ да латвійскіх сховішчаў прыроднага газу.
Газаправод Balticconnector быў перакрыты 8 кастрычніка. Прычынай стала падзенне ціску. Фінскія і эстонскія ўлады паведамілі, што адбылася ўцечка.
Цяпер чытаюць
Рэдактара незалежнай баранавіцкай газеты «Інтэкс-Прэс» Янукевіча прысудзілі да 14 гадоў калоніі, яго намесніка Пакаленку — да 12 гадоў5
Каментары