Справа аб забойстве Міхаіла Жызнеўскага: следчыя вызначылі меркаванае кола датычных асобаў

У Офісе генеральнага пракурора Украіны заявілі, што следчыя, якія расследуюць злачынствы ў часе масавых акцый пратэсту ў Кіеве ў 2013-2014 гадах, вызначылі кола асобаў, датычных да забойства беларуса Міхаіла Жызнеўскага, піша Радыё Свабода.

«Датычна [Рамана] Сеніка і [Міхаіла] Жызнеўскага ёсць канцавыя вынікі экспертыз, аднак яшчэ працягваецца комплексная экспертыза, прызначаная на падставе першых даследаванняў. Таксама датычна [Сяргея] Нігаяна, Сеніка і Жызнеўскага вызначана кола асобаў, якіх правяраюць на датычнасць да злачынства. Не выключаю, што ім неўзабаве ўручаць падазрэнні», — сказаў намеснік кіраўніка дэпартамента ў «справах Майдану» Офісу генпракурора Украіны Дзяніс Іваноў у інтэрв'ю ўкраінскаму агенцтву «Укрінформ».

У Міхаіла Жызнеўскага, Сяргея Нігаяна (абодва загінулі 22 студзеня 2014 года) і Рамана Сеніка (загінуў 25 студзеня 2014 году) стралялі кулямі для прымусовага спынення транспарту, якія выкарыстоўвалі толькі падраздзелы Міністэрства ўнутраных спраў Украіны. Першыя экспертызы паказалі, што ў іх стралялі з адлегласці 20 мэтраў.

У Офісе генпракурора Украіны паведамілі, што згодна з украінскім заканадаўствам, тэрмін даўнасці ў справах аб цяжкіх злачынствах складае 10 гадоў, а гэта азначае, што пасля гэтага адказныя за злачынствы могуць пазбегнуць адказнасці.

«Выключэннем зʼяўляюцца тыя справы, дзе абвінавачаныя хаваюцца ад органаў дасудовага расследавання. У іх тэрмін даўнасці прыпыняецца. Аднак справы паводле фактаў забойстваў, за якія прадугледжана пакаранне ў выглядзе пажыццёвага пазбаўлення волі, а таксама злачынстваў супраць дзяржаўнасці тэрміну даўнасці не маюць», — удакладніў яшчэ адзін намеснік кіраўніка дэпартаменту ў «справах Майдану» Офісу генпракурора Украіны Іван Бабенка.

Міхаіл Жызнеўскі загінуў 22 студзеня 2014 года падчас Еўрамайдана ў Кіеве. У 2017 годзе яго ўшанавалі званнем Героя Украіны і перад гэтым пасмяротна надалі ўкраінскае грамадзянства. Зорку Героя Украіны тагачасны прэзідэнт Пятро Парашэнка перадаў бацькам Міхася. Забойца дагэтуль не знойдзены.

У 2021 годзе ўлады Кіева дэмантавалі помнік Міхаілу Жызнеўскаму, які быў усталяваны ў лістападзе 2014 году недалёка ад меркаванага месца ягонай гібелі ў Кіеве — на рагу Пятроўскай алеі і вуліцы Грушэўскага. Сёлета ў кастрычніку дэмантаваны помнік знайшлі ў кустах недалёка ад таго месца, дзе ён знаходзіўся.

Помнік Міхаілу Жызнеўскаму дэмантавалі таму, што на гэтым месцы мэр Кіева Віталь Клічко ініцыяваў усталяванне мемарыяльнага комплексу героям-кіяўлянам, якія загінулі ў часе антытэрарыстычнай аперацыі на ўсходзе Украіны.

• 0
• 0
• 0
• 3
• 0
• 2
• 2
• 0