«Фатаграфавалі экран, калі лазілі па сацсетках». Пасажыр расказаў, як праходзіла праверка на беларуска-польскай мяжы
Чытач «Нашай Нівы» расказаў пра выпадак, калі з рэйсавага аўтобуса на дадатковую праверку адправілі адразу каля 10 пасажыраў.
Па словах пасажыра, які днямі вяртаўся з Польшчы рэйсавым аўтобусам праз пункт пропуску «Брэст», на дадатковую праверку выклікалі каля 10 чалавек. Цікавілі беларускіх сілавікоў толькі мужчыны.
«Адным загадалі прайсці для дадатковай праверкі, а іншым сказалі проста чакаць. Публіка была рознаўзроставая: калі самым маладым хлопцам было каля 20-25, то найстарэйшаму мужчыну — каля 60 гадоў», — згадвае суразмоўца.
Па яго словах, на праверку кожнага сыходзіла каля 20-30 хвілін. Правяральнікаў у тым кабінеце было двое.
«Падчас гутаркі правяралі змест тэлефонаў. Фатаграфавалі IMEI-нумар прылады. Правяралі падпіскі ў тэлеграме і сацсетках, прагортвалі перапіску. Часам правяральнік фатаграфаваў экран, калі лазіў па сацсетках», — распавядае суразмоўца.
Мужчына кажа, што паралельна з праверкай сілавікі вядуць нібыта нязмушаную гутарку. Сярод іншага пытаюцца, навошта ездзіў у Польшчу.
Суразмоўца адзначае, што гэта першы выпадак, калі пры перасячэнні мяжы да яго ўзніклі дадатковыя пытанні.
«У мяне няма судзімасцяў ці затрыманняў па палітычных артыкулах. Як я зразумеў, многія з дапытаных таксама былі палітычна «чыстымі». Часам кіроўца аўтобуса сам просіць першымі праходзіць кантроль тых, хто раней быў затрыманы па палітычных артыкулах, каб не затрымліваць увесь аўтобус».
Мужчына прызнаецца, што, нягледзячы на тое, што ўсе пасажыры пасля праверкі вярнуліся ў аўтобус, у іх засталіся засцярогі.
«Той факт, што яны фатаграфавалі IMEI і рабілі здымкі падчас прагортвання сацсетак, наводзіць на думкі, што праверка на мяжы можа мець наступствы пазней», — лічыць суразмоўца.
@nashaniva Беларус расказаў, як правяраюць тэлефоны на граніцы #беларусь #беларускіцікток #беларускітыкток #безопасность #граница #нашаніва #проверка #беларускаямова ♬ Paris - 3Hzwave Чытайце таксама:
На мяжы з Польшчай зноў пачалі збірацца вялікія чэргі з аўтобусаў
З Гродна ў Беласток — за 43 гадзіны. Беларускі аўтобус паставіў рэкорд па часе на мяжы
-
Саладуха распавёў, чаму пагадзіўся «круціць гусь» у хайповай рэкламе казіно
-
Хто быў першым намінантам на Нобелеўскую прэмію з Беларусі і што пра кандыдатаў-суайчыннікаў вядома з рассакрэчаных архіваў
-
Суддзю Брысіну, якая прысудзіла Паўлу Белавусу 13 гадоў калоніі, адправілі на пенсію і выдалі знак «За адданасць правасуддзю»
Каментары