«Сітуацыя складаная» — Павел Муравейка пракаментаваў становішча на паўднёвых рубяжах
«І яна мяняецца кожны дзень, прычым не ў лепшы бок», — кажа начальнік Генштаба.
Начальнік Генштаба Узброеных сіл — першы намеснік міністра абароны Павел Муравейка выказаўся аб становішчы на паўднёвых рубяжах краіны:
«Становішча на нашай паўднёвай мяжы дастаткова складанае. І яна мяняецца кожны дзень, прычым не ў лепшы бок.
У нас 1084 кіламетры дзяржаўнай мяжы з Украінай. Літаральна ў апошнія тыдні мы назіраем пакуль нічым не абгрунтаваную і пакуль незразумелую нам актыўнасць ля нашых межаў з боку Украіны.
У населены пункт Оўруч на ровенска-жытомірскім напрамку прыбылі падраздзяленні спецыяльнага прызначэння 1-й прэзідэнцкай брыгады. Спецназ паблізу ад дзяржаўнай мяжы заўсёды насцярожвае. І гэта тыя аб'екты, якія фарміруюць рэальныя выклікі, якія здольныя насыціць нашу тэрыторыю дыверсійна-разведвальнымі групамі, здольныя праводзіць правакацыі.
Акрамя таго, мы бачым перамяшчэнне войскаў, перыядычныя палёты беспілотнікаў тыпу «Байрактар» паблізу ад дзяржаўнай мяжы. Мы сутыкаемся з правакацыямі па дзеяннях беспілотнай авіяцыі на тактычным узроўні, якая парушае нашую Дзяржаўную мяжу.
Мы бачым, што адбываецца мініраванне і нарошчванне інжынерных загарод.
Мы вымушаны перамяшчаць туды нашы падраздзяленні, уступаць ва ўзаемадзеянне з органамі пагранічнай службы, нарошчваць асобныя напрамкі і рыхтавацца да прыкрыцця, а таксама рухаць туды артылерыю для таго, каб своечасова быць здольнымі адрэагаваць.
Я скажу, што абстаноўка няпростая. Калі пакуль відавочных правакацый магутных, рэзанансных не адбылося, то гэта толькі дзякуючы таму разумнаму сэнсу, які ёсць на ўсіх узроўнях камунікацыі і ўзаемадзеяння. Гэта і палітычныя дасягненні, гэта і памежнае ўзаемадзеянне, гэта і дзеянні нашых падраздзяленняў, у тым ліку паблізу мяжы. Але рэальныя выклікі, умовы для таго, каб зрабіць нейкія маніпуляцыі, сёння выразна праглядаюцца. Мы гэта бачым, і мы трымаем руку на пульсе», — рэзюмаваў першы намеснік міністра абароны.
Мінабароны: Украіна размясціла падраздзяленні спецназу на мяжы з Беларуссю
Памежны камітэт Беларусі ўгледзеў «Рускі добраахвотніцкі корпус» на мяжы з Украінай
«Украіна Беларусі не пагражае, мы вымушаныя абараняцца». Украінская памежная служба адказала беларускай
Мінабароны адправіла «Паланэзы» на прыкрыццё мяжы ВІДЭА
Цяпер чытаюць
«Калеснікава кажа, што не збіраецца выходзіць, пакуль не выйдзе апошні з палітвязняў»14
Каментары