Пасля падзей 2020 года беларусы пачалі актыўна з'язджаць з краіны. Другой па папулярнасці пасля Польшчы стала Літва, але ў апошнія месяцы колькасць грамадзян Беларусі там скарачаецца.
Мінус паўтары тысячы ад пачатку года
На піку літоўскі ДНЖ (любых тыпаў) мелі 62 844 грамадзяніны Беларусі. Так, паводле афіцыйных даных ад літоўскага дэпартамента міграцыі, было па стане на 1 красавіка 2024 года. Да таго часу лічба беларусаў у Літве з дзейнымі ДНЖ пастаянна расла.
Цяпер колькасць беларусаў з літоўскімі ДНЖ скарацілася на паўтары тысячы чалавек. Па стане на 1 кастрычніка такіх было 61 357 чалавек.
Для параўнання, за 2023 год прырост склаў крыху больш за 13 тысяч чалавек. Пікавым аказаўся 2022 год, калі ў Літве прыбавілася амаль 18 тысяч грамадзян Беларусі з ДНЖ. За 2021 год дадалося 7,6 тысячы беларусаў.
Па стане на 1 студзеня 2021 года ў Літве налічвалася 23 440 грамадзянін Беларусі з дзейнымі ДНЖ. Атрымліваецца, што за гэты час лічба беларусаў у Літве вырасла прыблізна ў 2,6 раза.
Лічба беларусаў з ПМЖ расце
Нягледзячы на тое, што агульная колькасць грамадзян Беларусі з ДНЖ у Літве пачала скарачацца, працягвае расці колькасць беларусаў з пастаянным дазволамі на жыхарства.
Калі па стане на 1 студзеня 2024 года такіх было 3537 чалавек, то на 1 кастрычніка — 3707. Па стандартнай працэдуры ПМЖ атрымліваюць праз 5 гадоў жыцця па часовым дазволе на жыхарства, таму гэта беларусы, якія прыехалі ў Літву яшчэ да 2020 года.
Таксама адметна, што ў Літве скарачаецца колькасць замежнікаў, якія легалізаваліся як высокакваліфікаваныя спецыялісты. Калі на пачатку ўладальнікаў ДНЖ тыпу Blue Card было 6256 чалавек, то на 1 кастрычніка засталося 6002 чалавекі. Больш за 4 тысячы з іх — грамадзяне Беларусі.
Паралельна з гэтым расце колькасць трымальнікаў ДНЖ, выдадзеных на гуманітарных падставах — 2496 чалавек у кастрычніку супраць 1846 на пачатку года.
Цяпер чытаюць
Мама Бажэны Ярэміч, якая рыхтуе прыгажунь для Лукашэнкі, купіла элітны катэдж коштам $837 тысяч26
Каментары