Блогер эмацыйна расказаў, дзе ў Беларусі самыя паганыя дарогі. І зусім не з-за іх пакрыцця
У тыктоку з'явілася 5-хвіліннае відэа, у якім барысаўскі тыктокер жорстка і з прымяненнем нецэнзурнай лексікі крытыкуе дарогі ў Жодзіне, заўважыла выданне Ex-press.by.
На думку блогера, не сама якасць дарог як такіх, а хаатычная разметка і арганізацыя руху робяць горад лідарам сярод самых нязручных для кіравання месцаў у Беларусі.
Ён расказаў, як палосы на дарозе раптам мяняюцца: спачатку ты едзеш па адной паласе, потым раптам з'яўляецца велапаласа, а праз некалькі метраў палосы разыходзяцца ў розныя бакі. З'яўляюцца нечаканыя перашкоды, пры гэтым адсутнічаюць папераджальныя знакі.
Адзін з ключавых момантаў у відэа — гэта апісанне абсурднасці сітуацыі з часовай разметкай, якая стварае хаос на дарогах. На думку тыктокера, калі б кіроўцы дзейнічалі дакладна ў адпаведнасці з ёй, то аварыі адбываліся б літаральна «на роўным месцы».
Ён таксама падкрэсліў, што многім кіроўцам дапамагае толькі вопыт частага праезду праз Жодзіна або назіранне за тым, як рухаюцца машыны наперадзе.
Таксама блогер іранічна адзначыў, што ў Жодзіне ўсё ж такі вядуцца дарожныя работы. І пажартаваў, што гэта робіцца не для мясцовых жыхароў, а таму што «прыедзе прэзідэнт»:
«Павінен проста прэзідэнт прыехаць. Вось таму там спецыяльна для прэзідэнта зрабілі паркоўку. Так. Што гэта я? І дарогу пашыраюць спецыяльна для прэзідэнта».
У каментарыях мясцовыя жыхары падтрымалі тыктокера, згаджаючыся, што дарогі ў Жодзіне сапраўды далёкія ад ідэалу.
«Пра сустрэчу Луку заўсёды прасілі перадаць Пуціну». Шустэр расказаў, як Лукашэнка прапаноўваў свае паслугі амерыканцам9
Каментары